Visi-Perezida w’akanama kari ku butegetsi muri Sudan, Gen Mohamed Hamdan Dagolo, uzwi cyane ku izina rya Hemeti, yavuze ko abanyapolitiki ari bo bo kwegekwaho igerageza ryo guhirika ubutegetsi ryaburijwemo ku wa kabiri kandi ko atari ubwa mbere byari bibayeho kuva Omar al-Bashir ahiritswe. Gen Hemet yumvikanye mu gitangazamakuru cya leta agira ati: “Abanyapolitiki ni bo mpamvu nyamukuru yihishe inyuma y’amahirikwa y’ubutegetsi kuko birengagije umuturage usanzwe… ahubwo bahangayikishijwe kurushaho no kurwanira uburyo bashobora kuguma ku butegetsi”. Yongeyeho ati: “Ibi byateje akababaro mu baturage. Abasirikare be bagiye baburizamo amagerageza menshi yo guhirika ubutegetsi kuva uwari Perezida Bashir yahirikwa. Hapfuye kudeta nyinshi kuva Bashir yava ku butegetsi.” Muri uku kwitana bamwana. Minisitiri w’Intebe wa Sudan, Abdalla Hamdok yari yavuze ko “abasigaye bo mu butegetsi bwabanje” bafite aho bahuriye n’uwari Perezida wahiritswe Omar al-Bashir, ari bo bihishe inyuma y’iryo gerageza ryo guhirika ubutegetsi ryapfubye. Minisitiri w’ububanyi n’amahanga Mariam al-Sadiq al-Mahdi yabwiye BBC ko igisirikare cyabujije abasirikare bafite amapeti yo hasi gufata ubutegetsi kandi ko ibi ari ikimenyetso cyuko igisirikare gishishikajwe no kubahiriza inzibacyuho Yavuze ko abari mu mugambi w’ihirikwa ry’ubutegetsi bari bafashe ahantu h’ingenzi ndetse aca amarenga ko bari bari hafi cyane yo gutangaza ko bahiritse ubutegetsi. Yongeyeho ko bari bagerageje gutuma abatekinisiye bo ku gitangazamakuru cy’igihugu babatangariza ko bahiritse ubutegetsi ndetse ngo bakanacishaho umuziki wa gisirikare. Gen Dagolo, ukuriye umutwe utabara byihuse aho rukomeye, yahoze ari inshuti ya Bashir. Abasirikare be bashinjwe gukora ubwicanyi ndengakamere mu karere ka Darfur kari mu burengerazuba bw’igihugu.
