Umucamanza wo mu gihugu cya Irak yasohoye impapuro zo guta muri yombi Perezida wa Leta Zunze Ubumwe za Amerika, Donald Trump, mu rwego rw’iperereza ku iyicwa ry’umusirikare mukuru wa Iran wiciwe muri iki gihugu ari kumwe n’umwe mu bayobozi b’inyeshyamba zikomeye zo muri Irak bishwe mu mwaka ushize.
Izi mpapuro zasohowe kuwa kane ushize n’umucamanza wo mu Rukiko rwa Baghdad kubera igitero cya drone cya Amerika cyahitanye Gen. Qassem Soleimani na Abu Mahdi al-Muhandis muri Mutarama 2020.
Al-Muhandis yari umuyobozi wungirije w’umutwe wemewe na leta ya Irak uzwi nka Hashed al-Shaabi , uhuriyemo imitwe yitwara gisirikare irimo n’udutsiko dushyigikirwa na Iran, washinzwe hagamijwe kurwanya Islamic State.
Gen. Soleimani yari akuriye umutwe wa Quds wo mu gisirikare cya Iran (Iran’s Revolutionary Guard Corps).
Impapuro zo guta muri yombi Trump zivuga ko iyicwa ry’abo bantu ari ubwicanyi bwagambiriwe, kandi buhanishwa igihano cy’urupfu. ni igihano kidashobora gushyirwa mu bikorwa ariko ngo kikaba ari ikimenyetso kibi ku buyobozi bwa Trump.
Ikinyamakuru The Guardian kivuga ko iki cyemezo cyafashwe nyuma y’aho umucamanza agejejweho inyandikomvugo z’abarega Trump bo mu muryango wa Abu Mahidi al-Muhandis.
Itangazo ryasohowe n’inama y’ikirenga y’ubucamanza rikaba rivuga ko iperereza kuri ubwo bwicanyi rigikomeje.
