Uruganda rukora imiti rwo muri Leta Zunze Ubumwe za Amerika, Pfizer, ruratangaza ko rwatangiye kugerageza ibinini bishobora kuvura no gukingira Covid-19.
Pfizer yavuze ko yatangiye igerageza kugira ngo hamenyekane niba imiti igabanya ubukana bwa Covid-19 yiswe PF-07321332, ishobora gukumira indwara ya Covid-19 ku bantu bakuze bagera ku 2660 bafite ubuzima bwiza baba mu nzu imwe n’umuntu ufite ubwandu ugaragaza ibimenyetso.
Kuri uyu wa mbere, Pfizer yavuze ko irimo irakora ibinini bizaba birimo doze nto y’umuti ugabanya ubwandu bwa VIH uzageragerezwa ku bantu bafite byibuze imyaka 18 kandi babana mu rugo rumwe n’umuntu wanduye Covid-19 nk’uko tubikesha forbes.com.
Kimwe cya gatatu cy’abarwayi bari mu igeragezwa bazahabwa placebo, mu gihe abasigaye bazahabwa ikinini kabiri ku munsi mu minsi itanu cyangwa 10.
Uru ruganda kandi rurimo kwiga ku muti uzahabwa abanduye Covid-19 ariko batarerekana ibimenyetso byayo.
Dr Mikael Dolsten, ukuriye ishami ry’ubushakashatsi, avuga ko uwo muti nuboneka izaba ari intambwe ishimishije kuko ushobora guhagarika Covid-19 hakiri kare mbere gukwirakwira mu mubiri.
