Iby’ingenzi byaranze ¼ cy’irushanwa ‘UEFA Champions League’ n’uko amakipe yakomeje yatomboranye

Sangiza iyi nkuru

Mu mikino yo kwishyura muri ¼ cya UCL (UEFA Champions League) yabaye ku wa 10 na 11 Mata 2018, habayemo gutungurana bikomeye kw’amakipe yo mu Butariyani nk’ikipe ya AS Roma yaje guhirwa n’urugendo, isezerera FC Barcelona ku gitego cyo hanze.

Ibi ni ibyaranze ¼ cy’irushanwa:

Ikipe ya AS Roma yasezereye FC Barcelona: Umukino wabanje FC Barcelona yari yatsinze AS Roma ibitego 4-1. Umukino wo kwishyura wabereye mu Butariyani, iyi kipe yo muri iki gihugu yigaranzuye iyo muri Esipanye (FC Barcelona), na yo iyitsinda ibitego 3-0 muri rusange biba 4-4, cya gitego AS Roma yatsindiye i Camp Nou cyatumye ikomeza nk’uko itegeko ribiteganya.

Ikipe ya Manchester City, yasezerewe na Liverpool yongeye gutsindwa: Ikipe ya Manchester City yatsinzwe ibitego 2-1 nyuma yo gutsindwa 3-0 mu mukino wabanje, wari wabereye kuri Anfield Stadium.

Umukino wa Bayern Munich na FC Seville ntiwabonetsemo igitego: FC Seville yari yatsindiwe 2-1 iwayo muri Esipanye, yarasezerewe nyuma yo kunganya n’iyi kipe yo mu Budage 0-0.

Real Madrid yakomeje irushanwa yiyushye akuya: Mu minota 60, ikipe ya Juventus yakiniraga hanze, yatsinze Real Madrid ibitego 3-0, ari na byo yari yatsindiwe iwayo. Ku ikosa rya myugariro wa Juventus, Real Madrid yahawe penaliti, Cristiano Ronaldo arayitsinda, abatariyani basezererwa batyo.

Gianluigi Buffon yabonye yeretswe ikarita itukura bwa mbere mu mateka ye: Uyu muzamu wa Juventus yateye amahane nyuma y’uko Real Madrid yari ihawe penaliti ku ikosa ryari rikozwe na Mehdi Benatia, wakiniye nabi Vazquez.

Uko tombora yagenze nyuma y’imikino ya ¼ cya UCL.

Ku wa Gatanu tariki ya 13 Mata, nibwo tombora y’imikino ya ½ yabaye. Ikipe ya Liverpool izabanza gukinira iwayo, yatomboye As Roma, naho Bayern Munich itombora Madrid, umukino ubanza uzabera mu Budage.

Umukino ubanza wa Liverpool na AS Roma uzaba ku wa 24 Mata, saa 20h 45 naho uwa Bayern Munich na Real Madrid uzaba ku wa 25 Mata, ku masaha amwe. Imikino yo kwishyura izaba ku ya 1 n’iya 2 Gicurasi.