Umuyobozi Mukuru wa Polisi y’u Rwanda, CG Felix Namuhoranye, ari kumwe n’Umunyamabanga Mukuru wa RIB, Col (Rtd) Pacifique K. Kabanda na Ambasaderi w’u Rwanda muri Singapore, Innocent Muhizi, ku wa Mbere bagiranye ibiganiro n’Umuyobozi wa Polisi ya Singapore, How Kwang Hwee.
Ibiganiro byibanze ku “gushimangira ubufatanye, guteza imbere ikoreshwa ry’ikoranabuhanga mu gipolisi no guhangana n’ibyaha bigenda bivuka”, nk’uko Polisi y’u Rwanda yabyemeje ku rubuga rwayo rwa X.
Intumwa z’u Rwanda biteganyijwe ko kuri uyu wa Kabiri zitabira inama iteganyijwe yiswe Milipol TechX Summit, ikaba igamije kurebera hamwe uburyo bwo guteza imbere ubutwererane mpuzamahanga mu bijyanye n’umutekano binyuze mu guhanga udushya mu ikoranabuhanga rigezweho.
Polisi y’u Rwanda n’iya Singapore, zifitanye amasezerano y’ubufatanye yashyizweho umukono mu kwezi kwa Kanama 2022, hagamijwe guteza imbere ubufatanye mu kubaka ubushobozi ndetse no gukumira no guhangana n’ibyaha byambukiranya imipaka.
Ayo masezerano akubiyemo kandi gushimangira ubufatanye muri gahunda zitandukanye z’amahugurwa, guhanahana ubunararibonye, gusangira amakuru, gufatanyiriza hamwe mu bikorwa byo kurwanya ibyaha no kurinda umutekano n’ituze rusange by’abaturage b’ibihugu byombi.
Hari kandi n’ubufatanye mu bikorwa byo kurwanya ibyaha by’ikoranabuhanga, icuruzwa ry’abantu, ihohoterwa rikorerwa abana hifashishijwe imbuga nkoranyambaga, iyezandonke n’ibindi byaha bifitanye isano, magendu n’ubucuruzi bw’intwaro bunyuranyije n’amategeko n’ikwirakwizwa ry’amasasu n’ibiturika.
