Tekereza ubyutse mu gitondo. Ufata ifunguro rya mu gitondo, ujya ku kazi cyangwa ku ishuri, ukoresha telefone, internet, banki, imodoka cyangwa moto. Ushobora gutekereza ko ibyo byose ubigenzura ubwawe. Ariko se, ni nde ufata ibyemezo bigena ibyo urya, ibyo unywa, amafaranga ukoresha cyangwa amakuru ureba buri munsi?
Iyi ni yo ngingo nyamukuru icyegeranyo cyitwa “The Illusion of Democracy” cyigerageza gusobanura. Iyi documentaire ivuga ko hari uburyo abantu bake bafite ububasha n’ibigo bikomeye bishobora kugira uruhare runini mu kugena uko ubuzima bw’abaturage bugenda kurusha uko benshi babyibwira.
Uko Leta n’Ibigo Bikomeye Bikorana
Mu bihugu byinshi, abaturage batekereza ko leta ishyiraho amategeko kugira ngo ibarengere. Urugero, niba uruganda rukora ibiribwa bibi, leta ishobora kuruhagarika. Niba uruganda rukora imiti ishobora guteza ikibazo, leta ishobora kuyibuza.
Ariko iki icyegeranyo ivuga ko rimwe na rimwe ibintu bitagenda gutyo.
Cyigaragaza ko hari abantu bakora mu nzego za leta zigenzura ibigo bikomeye, nyuma bakava muri leta bakajya gukorera ibyo bigo. Nyuma y’igihe runaka, bamwe bongera gusubira muri leta.
Ibi babyita “revolving door”, bivuze urugi ruzunguruka.
Tekereza umusifuzi wa ruhago. Niba nyuma y’umukino ahita ajya gukorera imwe mu makipe yakinnye, abantu benshi batangira kwibaza niba yari yarabogamiye kuri iryo kipe.
Iyo ni yo mpungenge icyegeranyo cyivuga ko ishobora kubaho hagati ya leta n’ibigo bikomeye.
Amategeko Ashobora Kurengera Abakomeye Kurusha Abato
Mu busanzwe amategeko aba agamije kurengera abaturage.
Ariko icyegeranyo cyivuga ko hari igihe amategeko ashobora kugora cyane abantu bato cyangwa ibigo bito.
Urugero: Tekereza ko ushaka gutangiza uruganda ruto rutunganya amata.
Niba usabwa amafaranga menshi cyane, ibyangombwa byinshi cyane ndetse n’ibikoresho bihenze cyane, ushobora kubura ubushobozi bwo gutangira.
Ariko uruganda runini rusanzwe rufite miliyari z’amafaranga rushobora kubyubahiriza bitamugoye.
Ibyo bituma abato baguma inyuma, abakomeye bagakomeza kuganza isoko.
Ikibazo cy’Imiti n’Ubuzima
Ikindi icyegeranyo cyibandaho ni inganda zikora imiti.
Mu buzima busanzwe, abantu bizera ko imiti yose iri ku isoko iba yaragenzuwe neza.
Nyamara icyegeranyo cyivuga ko hari igihe ibigo bikora imiti bishobora kugira ijambo rikomeye mu buryo iyo miti yemezwa.
Itanga urugero rwa Vioxx, umuti wakoreshwaga cyane ariko nyuma hakaza kuvugwa ko ushobora kongera ibyago byo kurwara umutima.
Abanenga ubu buryo bavuga ko iyo inyungu z’amafaranga zibaye nyinshi cyane, hari igihe umutekano w’abaturage ushobora kutitabwaho uko bikwiye.
Ikibazo cya Banki n’Amafaranga
Mu mwaka wa 2008 isi yahuye n’ikibazo gikomeye cy’ubukungu.
Banki nyinshi n’ibigo by’imari byari bigiye guhomba.
Mu gihe abaturage benshi bahombye amafaranga cyangwa akazi, leta zimwe zakoresheje amafaranga menshi zifasha ibyo bigo.
Ibi byatumye abantu bamwe bibaza bati: “Niba abaturage basanzwe bahomba bonyine, kuki ibigo bikomeye byo bifashwa?”
Aha ni ho havuye imvugo ngo “Too Big To Fail” bisobanura ko hari ibigo bifatwa nk’ibikomeye cyane ku buryo bitagomba kwemererwa guhomba.
Ese Itangazamakuru Ritubwira Byose?
Iki cyegeranyo cyivuga ko hari igihe itangazamakuru rishobora kumara igihe kinini ku nkuru z’imyidagaduro, amakimbirane y’ibyamamare cyangwa ibintu bidafite ingaruka zikomeye ku mibereho y’abaturage.
Mu gihe ibyo biri kuba, amategeko cyangwa ibyemezo bikomeye bishobora kuba biri gufatwa abaturage benshi batabyitayeho.
Urugero: Abantu bashobora kumara umunsi wose bavuga ku mukinnyi wamamaye cyangwa umuhanzi, ariko ntibamenye itegeko rishya ryafashwe rishobora kugira ingaruka ku misoro, ubucuruzi cyangwa ubwisanzure bwabo.
Bitcoin n’Ikoranabuhanga Ridakenera Umuhuza
Icyegeranyo kandi cyivuga ku mafaranga y’ikoranabuhanga nka Bitcoin.
Mu buryo busanzwe, iyo wohereje amafaranga ukoresha banki.
Banki ishobora kubika amafaranga yawe, kuyahagarika cyangwa kugenzura ibikorwa byawe.
Bitcoin yo ikora mu buryo butandukanye kuko idakenera banki nk’umuhuza.
Abayishyigikiye bavuga ko biha abantu ubwigenge bwinshi.
Ariko nanone abayinenga bavuga ko ishobora kugira ibibazo byayo birimo ihindagurika ry’agaciro n’ingaruka z’uburiganya.
Kuki Abantu Bamwe Bashaka Kubaho Mu Buryo Bwigenga?
Abantu bamwe bagaragara muri iki cyegeranyo bavuga ko igisubizo atari ugutegereza ko leta ihinduka.
Bo bavuga ko umuntu ashobora gutangirira ku bintu bito: Guhinga ibiribwa bye. Gushyigikira abacuruzi bato. Kwiga uko amafaranga akora. Kutizera amakuru yose yumvise atayagenzuye. Gukoresha ikoranabuhanga rimwongerera ubwigenge.
Bavuga ko iyo abantu benshi bagize ubwigenge mu mitekereze no mu bukungu, baba bafite ubushobozi bwo gufata ibyemezo bibagirira akamaro.
“The Illusion of Democracy” ntabwo ivuga ko buri mukozi wa leta cyangwa buri kigo kinini ari kibi. Ahubwo isaba abantu kwibaza ibibazo no kugenzura amakuru bahabwa.
“Ntimukemere ibintu byose mutabajije impamvu. Mujye musuzuma uburyo ububasha, amafaranga n’inyungu bishobora kugira uruhare mu byemezo bifatwa.”
