Hari amakuru ko abantu babarirwa muri za mirongo bishwe cyangwa bagakomereka, nyuma yuko igisirikare cya Ethiopia kirwanira mu kirere kimishe ibisasu ku isoko ryo mu karere ka Tigray kari mu majyaruguru y’igihugu. Ababibonye babwiye ibinyamakuru bya BBC, Aljazeera n’ibindi ko ku wa Kabiri igisirikare cya Ethiopia kirwanira mu kirere cyarashe ku mujyi wa Togoga, uri ku ntera ya kilometero 25 uvuye ku murwa mukuru Mekelle wa Tigray. Muganga ukorera ku bitaro bya Aider, bya mbere bikomeye by’i Mekelle, yabwiye BBC ko abantu batari munsi ya 60 bishwe naho abarenga 40 barakomereka. Igisirikare cya Ethiopia cyahakanye kurasa ku baturage b’abasivile, kivuga ko cyarashe gishaka guca intege “abakora iterabwoba”. Umuvugizi w’igisirikare cya Ethiopia yagize ati: “Nta na rimwe twigeze tugaba igitero cy’indege ku isoko. Ibi byashoboka gute? Igisirikare gishoboye kurasa kidahusha aho kigambiriye. “Twagabye ibitero by’indege, ariko gusa ku hantu hamwe na hamwe hagambiriwe”. Bivugwa ko mu minsi ya vuba ishize inyeshyamba zo mu karere ka Tigray zateye intambwe ku rugamba. umuryango w’abibumbye (ONU/UN) wasabye Ethiopia gukora iperereza kuri icyo kivugwa ko ari igitero cy’indege. Abantu babarirwa mu bihumbi barishwe naho abandi babarirwa muri za miliyoni bata ingo zabo nyuma yuko imirwano yadutse, ubu hashize hafi amezi umunani. Kurikira ibiganiro n’amavidewo binyura kuri Bwiza TV
