Umuryango w’Abibumbye ubinyujije mu ishami ryawo ryita ku burezi, siyansi n’umuco rizwi nka UNESCO wemeje ko ururimi rw’Igiswahili ruzajya rwizihizwa tariki ya 7 Nyakanga buri mwaka.
Iki cyemezo cyafatiwe mu nama yahuje ibihugu bigize UNESCO yabereye ku cyicaro cyayo, i Paris mu Bufaransa, tariki ya 23 Ugushyingo 2021, mu rwego rwo guha agaciro uru rurimi rukoreshwa cyane ku mugabane wa Afurika.
Mbere y’uko iki cyemezo gifatwa, habanje amatora, ibihugu byitabiriye iyi nama byemera ko Igiswahili kijya cyizihizwa. UNESCO yarabisobanuye iti: “UN yashyizeho umunsi wo kwizihiza Igiswahili. Uru rurimi ruzajya rwizihizwa tariki ya 7 Nyakanga buri mwaka. Icyemezo cyemewe n’abanyamuryango bose ba UNESCO, nta n’umwe wacyanze.”
Igiswahili ni ururimi rukoreshwa cyane mu karere ka Afurika y’Iburasirazuba, mu majyepfo no hagati kuri uyu mugabane. Ni rwo rurimi ibihugu bigize EAC byemeye kuzajya bihuriraho.
