Uwahoze ari umuyobozi w’ishyaka rya FDU Inkingi ritemerewe gukorera mu Rwanda, Victoire Ingabire Umuhoza yatanze ubutumwa buziguye nyuma yo kotswa igitutu n’abakoresha imbuga nkoranyambaga kuri uyu wa 14 Ugushyingo 2019.
Igitutu kuri Ingabire Victoire cyaturutse ku ijambo Umukuru w’Igihugu cy’u Rwanda, Paul Kagame yagejeje ku banyarwandanda ku munsi w’irahira ry’abashya muri guverinoma n’abayobozi b’ingabo bashya.
Perezida Kagame yavuze ku mutekano w’igihugu wari waramaze kuba ikintu gisanzwe kuko wari warabaye akamenyero ariko hakaba hari abamaze iminsi bagerageza kuwuhungabanya, ati: ” Muraza kutubona”.
‘Muraza kutubona’ ni ubutumwa Perezida Kagame yageneye abo yavuze ko bagize uruhare muri jenoside yakorewe Abatutsi mu 1994, barafungwa, bafungurwa bahawe imbabazi ariko ngo basubiye mu byaha bari barafungiwe. Perezida Kagame ati: ” Nimutabireka tuzabashyira aho mugomba kuba muri.”
Ubu ku mbuga nkoranyambaga, cyane nka ‘Twitter’ muraza kutubona ni yo mvugo yadutse, ibwira abashaka guhungabanya umutekano w’igihugu (abanzi b’igihugu muri rusange).
Victoire Ingabire washinze ishyaka rishya, DALFA Umurinzi akaba anariyoboye nta byinshi yigeze avugira kuri Twitter, keretse gushyiraho ikiganiro yagiranye na kimwe mu bitangazamakuru gikorera kuri internet gifite umutwe ugira uti: “Victoire Ingabire Umuhoza yatubwiye icyatumye asezera muri FDU-Inkingi agashinga irindi shyaka”. Yashyizeho ikindi kiganiro yagiranye n’ikindi gitangazamakuru gifite umutwe ugira uti: ” Nta bwoba mfite bwo gufungwa, sindakena byo kujya kwiba.”
Victoire Ingabire yabaye uwa mbere usanishwa n’ubutumwa bwa Perezida Kagame nk’uko bigaragara mu binyamakuru ndetse n’abakoresha imbuga nkoranyambaga.
Impamvu igagaragara abarimo Victoire ari bo bari basanzwe bavugwaho kwihisha inyuma ya politiki, demukarasi n’ubwisanzure. Ibi ni byo Perezida Kagame yatangaje kuri uyu wa 14 n’ubwo nta we yigeze avuga mu izina.
“Ndashaka kuburira bamwe mu bari hano bihisha inyuma y’ibintu nka politiki, demokarasi, ubwisanzure, ibintu natwe dushaka kandi tukaba ari twe ba mbere bo kubitanga” Paul Kagame.
Impamvu ya kabiri ni uko Victoire ari mu bafungiwe gupfobya jenoside yakorewe Abatutsi, wafunzwe, agafungurwa ahawe imbabazi, akaba avugwaho gukomeza ingengabitekerezo ya jenoside ndetse no kwifatanya n’imitwe Leta ivuga ko ari iyi iterabwoba ishaka kubuza u Rwanda umudendezo.
Vicoire yavuze ko avuye mu ishyaka rya FDU Inkingi yari amazemo imyaka 13 kubera ko abo bari bafatanyije kuyobora baba hanze y’igihugu. Yahisemo gushinga irishya, DALFA Umurinzi riharanira iterambere, demukarasi n’ubwisanzure nk’uko yabitangaje nkuko bigaragara ku rubuga rwaryo.
Hari ababonye guhindura ishyaka kwa Ingabire nka politiki yo kujijisha. Aba bamushinja kugira uruhare mu guhungabanya umutekano w’igihugu, yifatanyije n’imitwe irwanya ubutegetsi iri hanze y’igihugu. Hari abamushinja ndetse kugira uruhare mu gitero cyagabwe mu karere ka Musanze mu ntango z’Ukwakira.
Ku gitero cya RUD Urunana mu Kwakira 2019 i Musanze, Ingabire Victoire yashyize hanze ubutumwa bugaragaza akababaro yatewe n’abiciwemo ndetse n’abagabye igitero. Ibi hari ababifashe nko kujijisha nk’uko basanzwe babimuvugaho. Ku wa 8 Ukwakira 2019, nyuma gato y’iki gitero, RIB yahamagaje Ingabire Victoire kugira ngo ahatwe ibibazo bijyanye nacyo kuko yakekwagaho kukigiramo uruhare.
