Ku wa Kabiri, tariki ya 13 Werurwe 2018, Mu nama yahuje abahagarariye amadini n’amatorero akorera mu Ntara y’Amajyaruguru, Guverineri Gatabazi JMV yababwiye ko bakwiye kubaha Imana bakayisengera ahantu hayihesha icyubahiro, bakarinda abayoboke kujya mu myobo, mu mazi , mu butayu no mu misozi, kuko Imana iba hose.
Inama ihuje abayobozi b‘Intara, inzego z’umutekano, abayobozi b’uturere, n’abahagarariye amadini n’amatorero ahakorera. Ikaba yari igamije kureba ibijyanye no gushyira mu bikorwa amabwiriza y’ifunga n’ihagarikwa ry’insengero zitujuje ibyangombwa. Muri iyi nama abanyamadini n’ubuyobozi bw’Intara n’uturere tuyigize, bahafatiye umwanzuro wo gusengera ahantu hazima hahesha Imana icyubahiro, kuko nabo ubwabo baba mu mazu y’ibitabashwa nk’uko ijambo ry’Imana ribivuga.
Inama yatangiye, hagaragazwa uko igenzura ryo gufunga isengero zitujuje ibyangombwa rihagaze, mu Ntara y’Amajyaruguru hamaze gufungwa insengero zigera kuri 775 . Abitabiriye iyi nama baganiriye ku kibazo k’insengero zitujuje ibyangombwa, hagamijwe kurebera hamwe uburyo amadini n’amatorero yarushaho gusengera ahantu haboneye kandi hadashyira ubuzima bw’abakiristu mu kaga. Guverineri Gatabazi yabwiye abayobozi b’amadini n’amatorero ko iki gikorwa cyo gufunga izi nsengero kidakwiye kugira uwo gitera impungenge kuko byose bikorwa mu nyungu z’abaturage no kurengera ubuzima bwabo butarajya mu kaga.
Ati: “Leta si yo yari ikwiye kuba ibagenzura , ndagirango tukivuganeho, abafite insengero zitujuje ibyangombwa , ntibikwiye ko dusengera Imana ahantu hatayubahishije, ahantu hashobora no gushyira ubuzima bw’abaturage bacu mu kaga, bajya gusengera ahantu hadashobotse, mu mazi , mu buvumo, mu misozi, mu butayu, ibyo ntibyemewe, muhindure imyumvire yabo muyobora, imyigishirize yanyu ijyane n’igihe”.
Yakomeje avuga ko ku rupapuro rwanyuma muri bibiliya ku murongo wa nyuma hari amagambo avuga ko “ nta kintu na kimwe ukwiye kongeraho cyangwa ngo ugabanye’.
Ati: “Kuki mucurika bibiliya , abavuga ko baba bagiye mu butayu babukura he? mu Rwanda nta butayu buhari, Imana ntiba mu myobo cyangwa mu mazi. Iyo ushatse kuzana ubutayu mu Rwanda ntabuhari uba ubikura he ? niba abisiraheli barambutse Yorodani bava mu Misiri, mu Rwanda hageze Yorodani gute? ntabwo umuntu akwiye gushora imari n’amafaranga ngo agiye gushaka Imana mu bisambu, ahantu hadakwiye gusengerwa ? Imana iba hose, abantu nibahindure imyumvire”.
Abanyamadini n’amatorero bari mu nama bashimye Leta kuba yarakoze igikorwa cyo kugenzura no gufunga insengero ngo kuko nabo ubwabo hari aho bageraga bakagira isoni zo kuhasengeshereza, bavuze ko bagiye gufatanyiriza hamwe bagakora uko bashoboye bakemura ikibazo cy’akajagari bafatanyije n’inzego zibanze, kandi bakaba bagiye gukorera hamwe mu ubufatanye bafasha bamwe mubafungiwe insengero mugutizanya aho gusengera bahana ibihe mu umwanya wo gusenga mu insengero zitafunzwe.
Abanyamadini n’Intara y’amajyaruguru bemeranyijwe ko abafungiwe insengero nabandi bakigenzurwa bagomba gukora ibyo basabwe bagafungurirwa, kubwira abayoboke bayobora guhagarika ibikorwa byo gusengera ahantu hatemewe , guhagarika inyigisho z’ubuyobe zirimo izo kutajya kwamuganga bajya gusengerwa mubyumba by’amasengesho bitemewe , kubuzwa kurya indyo zimwe na zimwe, kubaka insengero zijyanye n’imyubakire, gushyiraho imirindankuba n’ibindi. Ibi bikazakorwa hagendeye kumiturire n’imiterere yahubakwa izo nsengero mu uturere tugize iyi ntara y’amajyaruguru.
