Ingabo za Repubulika ya Demukarasi ya Congo, zikomeje kwica abarimo ab’uruhu rwera baba mu mutwe witwaje intwaro wa ADF washinze ibirindiro mu duce tumwe na tumwe mu Ntara ya Kivu y’Amajyaruguru.
Tariki ya 2 Mutarama 2021, Umuvugizi wa Operasiyo Sokola 1 igamije guhashya imitwe yitwaje intwaro, Lt. Anthony Mualushayi yatangaje ko ingabo z’igihugu zishe abarwanyi 14 barimo Abarabu bafite uruhu rwera babiri, mu gace ka Loselose kari muri Teritwari ya Beni.
Yagize ati: “Ingabo zacu zo muri Regima 3202 zagabye igitero ku barwanyi ba ADF mu giturage cya Loselose tariki ya 1 Mutarama. Abarwanyi 14 ba ADF barimo Abarabu b’uruhu rwera 2 bishwe, zimwe mu ntwaro zirafatwa.”
Na none kuri uyu wa 8 Mutarama 2021, ubwo Umuvugizi w’Ingabo za RDC, Maj. Gen. Richard Kasonga yagiranaga ikiganiro n’itangazamakuru, yavuze ko bari kugerageza guhashya uyu mutwe ukomoka muri Uganda.
Gen. Kasonga yavuze ko mu barwanyi ba ADF bakomeje kwicwa, harimo n’ab’uruhu rwera, aho yagize ati: “Ab’uruhu rwera bari mu bagize umutwe wo muri Uganda, bari kugaba ibitero ku ngabo za RDC barishwe.”
Umutwe wa ADF bivugwa ko ugendera ku mahame y’idini ya Isilamu, ku buryo waba uterwa inkunga n’indi mitwe y’iterabwoba ikomeye nka Al Qaeda yiganjemo Abarabu b’uruhu rwera. Bishoboke ko aba bakomeje kwicwa, baba bari mu boherezwa ngo bafashe aba barwanira muri RDC.
