Guverinoma ya Sudani y’Epfo yamaganye ibitero by’indege y’intambara ya Sudani ivuga ko byagabwe ku bwinshi ku butaka bwayo kuri uyu wa Kane nk’uko bitangazwa na Chimpreports dukesha iyi nkuru. Umwuka ukaba utari mwiza hagati y’ibihugu byombi ndetse hakaba hashobora no kuvuka intambara.
Ibi ngo byabaye mu masaha ya saa tanu z’amanywa kuri uyu wa kane, bikaba byateje umwuka mubi hagati y’ibihugu byombi, Sudani y’Epfo ikaba yatangaje ko igisirikare cyayo (SPLA) kiteguye kurinda abaturage bacyo, ibyabo, ndetse n’ubusugire bw’igihugu cyabo.
Umuvugizi w’igisirikare cya Sudani y’Epfo, Brig. Gen. Lul Ruai Koang, yatangaje ko indege yo mu bwoko bwa Antonov y’igisirikare cyo mu kirere cya Sudani yateye za bombe ku birindiro by’ingabo za Sudani y’Epfo ahitwa Babaneis mu burasirazuba bw’umujyi wa Renk.
Yavuze ko bombe batewe zose hamwe ari 12, imwe ikaba yashwanyukiye hafi y’ibirindiro bya batayo y’109 y’igipolisi cya gisirikare (MP), isiga ibitwitswe. Ngo ntawakomeretse haba muri SPLA cyangwa mu baturage.
Umuvugizi wa SPLA yagize ati: “Ni byiza kumenyesha ingabo zacu, abaturage ba Sudani y’Epfo, akarere n’Umuryango Mpuzamahanga ko igitero cya bombe cyo mu kirere cy’ingabo zo mu kirere za Sudani cyagabwe nta bushotoranyi bwabaye kandi ari ukuvogera ikirere cyacu.”
Ibi bintu byabaye nyuma y’icyumweru umuyobozi mukuru muri Sudani atangaje ko igihugu cye giteganya gufunga imipaka yacyo na Sudani y’Epfo bitewe n’ibikorwa by’ubugizi bwa nabi ngo byari bikomeje kwiyongera ku butaka bwayo kandi bishyigikiwe n’umuturanyi.
Perezida Salva Kiir ariko akaba yarakomeje guhakana ko atera inkunga abashaka guhirika perezida Omar Bashir ku butegetsi.
Mu myaka micye ishize ngo abakomando kabuhariwe ba SPLA bakaba baranesheje ingabo za Sudani mu rugamba rwabereye mu mujyi ukungahaye kuri peteroli wa Heglig. Iyi mirwano ikaba yaramaze iminsi mbere y’uko Umuryango Mpuzamahanga usaba impande zombi zari zihanganye gusubiza ingabo zazo inyuma.
Hagati aho ariko, igisirikare cya Sudani y’Epfo kivuga ko kimaze iminsi 4 kigenzura urujya n’uruza rudasanzwe rw’ingabo za Sudani ndetse n’abandi barwanyi babarirwa mu 3,000 bitwaje ibirwanisho mu bice bitandukanye. Izi ngabo nk’uko abayobozi babitangaza, ngo zageze ahitwa Bouth kuwa 19 Werurwe 2016 kandi ngo zitegereje amabwiriza ya nyuma ya Lt. Gen. Yahya Mohammed Kheir wo mu gisirikare cya Sudani (SAF) n’abandi bayobozi muri minisiteri y’ingabo.
Izi ngabo ngo zifite ibimodoka by’intambara (Tanks) bigera ku 10, n’ibindi bikoresho birimo ibyo bita 4 D-30s, , 3 BM multi-rocket launchers n’izindi ntwaro nto.
Umuvugizi wa SPLA akaba avuga ko izi ngabo zishaka kwigarurira ibice byo ku mupaka ubundi zigasunika inyeshyamba ziyobowe na Kamal Loma ngo zigatera impunzi ziri muri Sudani y’Epfo. Biravugwa kandi ko izindi ngabo za Sudani zirimo zirasatira imisozi ya Kalgo yegereye Sudani y’Epfo.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
