Abatoza b’ikipe ya Rayon Sports Women Football Club barangajwe imbere na Rwaka Claude wari umutoza mukuru, bamaze guhagarika akazi muri iyi kipe nyuma yo kumara igihe badahembwa.
Umutoza Rwaka yafatanye icyo cyemezo n’uwari umwungiriza we ndetse n’uwari umutoza w’abanyezamu.
Amakuru avuga ko aba batoza bafashe icyo cyemezo nyuma yo kumara amezi atatu badahabwa umushahara ndetse n’amafaranga y’uduhimbazamusyi tw’imikino itanu bamaze igihe batsinda.
Amakuru kandi avuga ko hari ibirarane byo mu mwaka ushize Rayon Sports ibereyemo aba batoza.
Rwaka na bagenzi be bafashe icyemezo cyo guhagarika akazi, mu gihe mu mpera z’iki cyumweru iyi kipe ifite umukino w’ishiraniro izahuriramo na AS Kigali bahataniye igikombe cya shampiyona.
Bafashe kiriya cyemezo kandi nyuma y’amasaha make Rayon Sports WFC inyagiye Ndabuc WFC ibitego 9-0.
