Umutwe wa AFC/M23 wahaye isezerano u Burundi ko utazigera na rimwe wemera ko imitwe irwanya ubutegetsi bwabwo ikorera mu burasirazuba bwa Repubulika Iharanira Demokarasi ya Congo yifashisha uduce wabohoye nk’ibirindiro byo guhungabanya umutekano w’icyo gihugu.
Uyu mutwe watanze iryo sezerano biciye mu itangazo ryasohowe n’umuvugizi wawo mu bya Politiki, Lawrence Kanyuka.
Byari nyuma y’uko kuri uyu wa Mbere tariki ya 15 Ukuboza, AFC/M23 yafashije impunzi z’Abarundi gusubira mu gihugu cyabo ku bushake.
Uyu mutwe ku ruhande rwarwo na wo wasabye ubutegetsi bwa Gitega gukora igikorwa nk’icyo, na bwo bukemerera abanye-Congo bahatirijwe guhunga ibitero by’ihuriro ry’ingabo za Kinshasa by’umwihariko abo mu duce twa Luvungi, Sange na Katogota gusubira iwabo.
Usibye abaturage AFC/M23 yashyikirije u Burundi, yanashimangiye ko yiteguye “gushyikiriza Guverinoma y’u Burundi abasirikare bafatiwe ku rugamba, no gutangaza agahenge k’uruhande rumwe”, mu rwego rwo gufasha abanye-Congo bavuye mu byabo gutahuka mu mahoro no mu cyubahiro.
Yunzemo ko itazemera ko hari imitwe irwanya ubutegetsi bw’u Burundi yifashisha uduce igenzura mu guhungabanya umutekano w’icyo gihugu.
Iti: “Ku bijyanye n’imitwe yitwaje intwaro irwanya ubutegetsi bw’u Burundi igikorera muri Repubulika Iharanira Demokarasi ya Congo, AFC/M23 irizeza ko itazemera ko iyo mitwe yifashisha uduce twabohowe nk’ibirindiro by’ibikorwa bibi bibi bishobora kubangamira uguturana neza hagati y’ibihugu byacu byombi.”
U Burundi buvuga ko muri Kivu y’Amajyepfo hakorera imitwe yitwaje intwaro irwanya ubutegetsi bwabwo, irimo uwa RED-Tabara na FNL ya Jenerali Aloys Nzabampema.
AFC/M23 yasezeranyije Gitega ko itazemerera iriya mitwe gukorera ku butaka bwayo, mu gihe uwo muturanyi wayo mushya yakunze kugaragaza ko nka RED-Tabara basanzwe bafatanya urugamba.
