Minisitiri w’intebe wa Israel Benjamin Netanyahu avuga ko ibitero bya Israel kuri Gaza bimaze iminsi icyenda byasubije Hamas inyuma imyaka myinshi kandi ko bigikomeza kugeza ituze ribonetse. Israel n’amatsinda y’intagondwa z’Abanye-Palestina zo muri Gaza bongeye kurasana nijoro kugeza mu masaha yo mu rukerera rwo kuri uyu wa Gatatu nk’uko BBC ibitangaza. Abakozi babiri b’abanyamahanga bakora mu murima urimo n’urwuri, ku wa kabiri bishwe na rokete zarashwe n’intagondwa z’Abanye-Palestina mu majyepfo ya Israel. Israel yakomeje ibitero byayo by’indege kuri Gaza. Muri West Bank, Abanye-Palestina batari munsi ya batatu bishwe n’abapolisi ba Israel mu myigaragambyo yabereye hafi ya Ramallah. Netanyahu yavuze ko Hamas, umutwe w’intagondwa w’Abanye-Palestina ugenzura Gaza, “washegeshwe mu buryo utari witeze” kandi ko ibitero “bizakomeza kugeza igihe bizafata ngo ituze rigaruke” ku baturage bose ba Israel. Abantu batari munsi ya 215, barimo hafi abagore 100 n’abana, biciwe muri Gaza kugeza ubu, nkuko minisiteri y’ubuzima ya Gaza ibivuga. Muri Israel, abantu 12, barimo abana babiri, barishwe, nkuko urwego rw’ubuvuzi rubivuga. Ku wa kabiri, Israel yavuze ko intagondwa zitari munsi ya 150 ziri mu biciwe muri Gaza. Hamas ntabwo itanga umubare w’abarwanyi bayo bapfuye. Mbere yuko iyi mirwano itangira, Israel yagereranyaga ko amashami abiri y’intagondwa zo muri Palestina afite ububiko bw’ibisasu burimo rokete hafi 12.000 muri Gaza. Kurikira ibiganiro n’amavidewo binyura kuri Bwiza TV
