Indege z’intambara za Israel zarashe ibisasu mu ntara ya Gaza mu gitondo cyo kuri uyu wa Gatanu tariki 31 Mutarama, nyuma y’amasaha make iki gihugu kirashweho ibisasu bitatu byari biturutse muri Palestine. Igisirikare cya Israel cyatangaje ko bibiri muri biriya bisasu byakumiriwe n’ubwirinzi bwo mu kirere, mu gihe icya gatatu cyaguye ahantu mu bisambu bitarimo ikintu. Nta wakomerekejwe na byo cyangwa ibindi bintu byangije byatangajwe. Itangazamakuru ryo muri Palestine ryatangaje ko mu duce twa Khan Younis na Rafah duherereye mu majyepfo y’intara ya Gaza humvikanye iturika rikomeye, ryabaye umusaruro w’ibisasu bikomeye byaharashwe n’igisirikare cya Israel. Igisirikare cya Israel mu itangazo cyashyize ahagaragara, cyemeje ko cyarashe biriya bisasu intego ari ukurasa ku barwanyi b’umutwe wa Hamas. Byatangajwe ko umwana w’ibyumweru bitatu na nyina umubyara bajyanwe kwa muganga, nyuma yo gukomeretswa na biriya bisasu. Umwuka mubi hagati ya Israel na Gaza wongeye kufata indi ntera mu byumweru bibiri bishize, nyuma y’amezi menshi hari agahenge. Ni nyuma y’umugambi wiswe’uwo kugarura amahoro’ wamuritswe na Leta Zunze Ubumwe za Amerika, ukamaganirwa kure n’Abanya-Palestine bashinja Amerika kubogamira kuri Israel. Umugambi wa Trump urimo ko ashobora kwemera Leta ya Palestine, hanyuma umujyi wa Yeluzalemu ukaba umurwa mukuru wa Israel, Palestine nayo igashaka undi mujyi igira umurwa wayo.
Ibi bisasu byanashenye indaki abarwanyi b’umutwe wa Hamas bacuriragamo intwaro.
