Umunyamakuru Bagirishya Jean de Dieu (Jado Castar) wabaye Visi Perezida wa kabiri w’ishyirahamwe ry’umukino wa Volleyball, arafungurwa nyuma y’amezi abiri.
Icyemezo cyo kumufungura kizashingira ku cyasomwe n’urukiko rw’ubujurire kuri uyu wa 7 Werurwe 2022, cyo kumugabanyiriza igihano, kigera ku mezi umunani y’igifungo.
Castar yatawe muri yombi tariki ya 20 Nzeri 2021, akurikiranweho icyaha cyo guhimba no gukoresha inyandiko mpimbano. Kuva ari mu maboko y’urwego rw’ubugenzacyaha yaracyemeye.
Yaraburanishijwe, mu Kwakira 2021 Urukiko Rwisumbuye rwa Gasabo rumukatira igifungo cy’imyaka ibiri, rumaze kumuhamya ibi byaha.
Castar yarajuriye, muri Mutarama 2022 aratakamba asobanura ko atigeze ahakana iki cyaha ashinjwa, asaba ko yafungurwa, byibuze igifungo yakatiwe kigasimbuzwa ihazabu.
Tariki ya 25 Gashyantare 2022 byari byitezwe ko ari bwo umucamanza asoma umwanzuro ariko ntibyabaye, asobanura ko yari agitegura uru rubanza.
Castar wagabanyirijwe igihano yari amaze amezi atandatu afunzwe. Bisobanuye ko azarekurwa niyuzuza umunani.
