Kuwa Gatandatu, itariki 30 Gicurasi, Abasirikare b’u Rwanda bari mu butumwa bwo kubungabunga amahoro muri Sudani y’Epfo, Juba, bifatanyije n’ingabo zo mu bindi bihugu zikorera muri UNMISS mu kwizihiza Umunsi Mpuzamahanga wa LONI wahariwe ababungabunga amahoro, ufite insanganyamatsiko igira iti: “Gushora mu mahoro.”
Iki gikorwa cyaranzwe n’akarasisi ka gisirikare, kuzirikana no guha icyubahiro abaguye mu butumwa bwo kubungabunga amahoro, ndetse n’ubutumwa bwatanzwe bwo gusaba ko amahoro n’umutekano birushaho kwimakazwa muri Sudani y’Epfo.
Habaye no gushimira abayobozi bakuriye ingabo z’ibihugu bitandukanye ku ruhare bagize mu marushanwa yateguwe mu guha icyubahiro abaguye mu bikorwa byo kubungabunga amahoro.
Abasirikare b’u Rwanda berekanye umuco nyarwanda binyuze mu mbyino, banakora akarasisi ka gisirikare kitabiriwe n’ingabo zituruka mu bihugu bitandukanye.
