Msanii mashuhuri wa muziki wa rap, Kanye West, pamoja na mkewe Bianca Censori, wamekuwa wakipokea matibabu katika kituo cha afya ya akili na tabia cha The Balance Rehab Clinic, kilichoko Mallorca, Uhispania.
Kwa mujibu wa RadarOnline, wanandoa hao wamekuwa wakikaa katika kituo hiki cha kifahari kwa siku kadhaa, ambapo gharama ya wiki moja ya matibabu inaweza kufikia dola 170,000 za Kimarekani. Kituo hiki kinatoa huduma mbalimbali zikiwemo malazi, chakula, ushauri wa kitaalamu na wataalamu wa akili, yoga, pamoja na programu nyingine za kuboresha afya ya akili.
Tovuti ya kituo hicho inaeleza kuwa ni “mahali salama panapotoa tiba inayosaidia mtu kurejesha amani ya ndani, kupumzika na kufurahia maisha.” Kituo hiki pia kina matawi katika nchi nyingine kama vile Uswisi (Zurich), Uingereza (London), Marbella, na maeneo mengine.
Taarifa zinaonyesha kuwa sababu ya safari hiyo huenda inahusiana na kesi ya kisheria iliyofunguliwa na mfanyakazi wa zamani wa Kanye West, Benjamin Provo, aliyemshtaki kwa kumfukuza kazi kinyume cha sheria. Nyaraka za mahakama zinaonyesha kuwa Kanye amekuwa katika kituo hicho kwa muda, hali inayoeleza ni kwa nini hajaonekana hadharani kwa muda mrefu.
