Mu gihe bamwe mu baturage ba Kenya bamaze iminsi bamagana inguzanyo Ikigega mpuzamahanga cy’imari (IMF) giteganya guha Leta, yatangaje ko ishaka indi ya miliyoni 750 z’amadolari ya Amerika ($).
Nk’uko byatangajwe n’Ikigega cy’Igihugu ku wa 7 Mata 2021, Leta iri mu biganiro na Banki y’Isi kugira ngo izayihe iyi nguzanyo mbere ya Kamena uyu mwaka, ikaba izifashishwa mu guteza imbere urwego rw’ubukungu.
Itangazo ry’iki kigega risohotse nyuma y’aho tariki ya 2 Mata, IMF yatangaje ko inama y’ubutegetsi yayo yemeje ko Kenya izahabwa inguzanyo ya miliyari 2.34$, yo kwifashisha mu guhangana n’ingaruka zatewe n’icyorezo cya Covid-19.
Bamwe mu Banyakenya bakoresha urubuga rwa Twitter na Facebook, batangiye kwamaganira kure IMF, bayisaba ko yahagarika iyi nguzanyo iteganya guha Leta bitarenze tariki ya 21 Mata, basobanura ko n’izindi nguzayo yahawe mbere itarazishyura.
Mu gihe abakoresha izi mbuga bakomeje kwandika ibitekerezo byibasirira IMF ku mbuga zayo, hanatangijwe ubukangurambaga bushishikariza abandi gusaba iki kigega guhagarika iyi nguzanyo. Bukorerwa ku rubuga rwa Change.org, kugeza ubu abarenga 230,000 bakaba bamaze gushyiraho imikono, bemeza ko bashyigikiye iyi ngingo.
Mu myaka ibiri ishize, Banki y’Isi imaze guha Leta ya Kenya inguzanyo ya miliyari 1.7$ irimo miliyoni 750$ yayihaye mu mwaka w’2019, na miliyari 1$ yayihaye mu 2020 kugira ngo iyifashe guhangana n’ingaruka za Covid-19.
Kurikira amavidewo y’ibiganiro bya BWIZA TV
