Umukandida w’impuzamashyaka Azimio La Umoja One Kenya, Raila Odinga, yamaze kwigaranzura mukeba we William Ruto mu majwi akomejwe kubarurwa.
Kuri ubu Komisiyo y’amatora muri Kenya ikomeje kubarura amajwi y’ibyavuye mu matora y’Umukuru w’igihugu yabaye ku wa Kabiri tariki ya 09 Kanama.
Imibare kuri ubu irerekana ko Odinga ari imbere n’amajwi 51.78%, nyuma yo gutorwa n’ababarirwa muri 5,224,134.
Dr William Ruto umaze gutorwa n’ababarirwa muri 4,796,995 aramugwa mu ntege n’amajwi 47.55%.
Odinga yigaranzuye Ruto mu gihe uyu wahoze ari Visi-Perezida wa Kenya ari we wiriwe imbere ku munsi w’ejo.
Abandi bakandida bahatanye n’aba bagabo bo birasa n’aho bamaze gukuramo akabo karenge burundu, kuko nka George Wajackoyah amaze kubona amajwi angana na 0.44% mu gihe David Waihiga ari inyuma na 0.23%.
Amakuru avuga ko amajwi abarirwa muri miliyoni enye ari yo asigaye kubarurwa, ku buryo nta gihindutse ku gicamunsi cyo kuri uyu wa Kane hashobora gutangazwa by’agateganyo uwegukanye intsinzi.
