Kenya: William Ruto yakuweho amajwi 10,000 yari yahawe atayakwiriye

Komisiyo yigenga y’amatora muri Kenya (IEBC), yakuye amajwi 10,000 ku yo Dr William Ruto amaze kubona mu matora y’umukuru w’igihugu aheruka kuba muri kiriya gihugu, nyuma yo gusanga harabayeho kwibeshya mu kuyamuha.

IEBC yaherukaga gutangaza mu majwi yavuye kuri site y’itora iherereye mu gace ka Kiambu Town, William Ruto yagize amajwi 51,050 na ho Raila Odinga bahanganye agira 14,860; nyamara abatoye ari 56,546.

Kuri iyi site David Mwaure na George Wajackoyah bombi bahatanye muri ariya matora buri umwe yagize amajwi 318.

Komiseri wa Komisiyo y’amatora muri Kenya, Justus Nyangaya, yavuze ko Ruto bari bamwongereye amajwi 10,000 ugereranyije n’ayo yari yabonye. Ni ibyamenyekanye nyuma y’uko ikibazo cy’ariya majwi kizamuwe n’abanyamakuru.

Nyang’aya yatangaje ko amajwi y’ukuri Dr William Ruto yabonye ari 41,050 aho kuba 51,050 nk’uko byari byatangajwe, avuga ko uyu mugabo usanzwe ari Visi-Perezida wa Kenya yari yahawe ariya majwi mu kubera kwibeshya.

Ni ibyateye amakenga mu bashyigikiye Raila Odinga batangiye kujujura ko Dr Ruto ashobora kuba ari n’ahandi yibiwe amajwi.

Kugeza ubu biracyagoye kumenya uwegukanye intsinzi hagati ya Ruto na Odinga muri aya matora yabaye ku wa Kabiri w’iki cyumweru, kuko amajwi bombi babonye asa n’aho yegeranye cyane.

Ikindi biracyagoranye cyane kumenya uri imbere y’undi, kuko imibare itangwa n’ibitangazamakuru byo muri Kenya yerekana amajwi atandukanye kuri bariya bagabo bombi.

IEBC cyakora cyo ivuga ko kuba aya majwi atandukanye na kibazo kibirimo, bijyanye no kuba ibitangazamakuru bitangaza amajwi byavanye ku masite y’itora atandukanye.

Iyi Komisiyo ivuga ko imibare y’amajwi izahura mu gihe izaba yarangije kubarura amajwi yose.