Kepa na Jorginho batumye Chelsea y’abakinnyi 10 itsindwa na Liverpool (Amafoto)

Ikipe ya Liverpool yegukanye amanota atatu y’umunsi wa kabiri wa shampiyona y’Abongereza, nyuma yo gutsinda Chelsea ibitego 2-0.

Ni umukino wari utegerejwe n’Isi yose Liverpool yatwaye igikombe cya shampiyona y’umwaka ushize, yari yasuyemo Chelsea yiyubatse cyane igura abakinnyi ku kibuga Stamford Bridge.

Igice cya mbere cy’uyu mukino cyaranzwe n’uburyo buke hagati y’amakipe yombi. Chelsea yabonye uburyo bukomeye bubiri bwahushijwe na rutahizamu wayo mushya, Timo Werner, mu gihe Liverpool yahushije uburyo nkabwo binyuze kuri Mohamed Salah na Roberto Firmino.

Mbere gato y’uko igice cya mbere cy’umukino kirangira, myugariro Andreas Christensen wa Chelsea yeretswe ikarita itukura, nyuma yo gukorera ikosa ku munya-Sénégal Sadio Mané washoboraga gutsindira Liverpool igitego cya mbere.

Ni ikarita yashegeshe cyane Chelsea y’umutoza Frank Lampard, bihurirana n’impinduka Liverpool yakoze yinjiza mu kibuga Umunya-Espagne Thiago Alcântara wasimbuye Kapiteni Jordan Henderson.

Ukwinjira kwa Thiago wakiniraga Liverpool umukino wa mbere nyuma yo kuyigeramo avuye muri Bayern Munich, kwafashije cyane ubusatirizi bwa Liverpool, bituma ku munota wa 50 w’umukino Mané atsindira ikipe ye igitego cya mbere. Ni ku mupira yari aterekewe ku mutwe na Trent Alexander-Arnold.

Nyuma y’iminota ine Sadio Mané yatsindiye Liverpool igitego cya kabiri, kuri kado y’umupira yari ahawe n’umuzamu Kepa Arrizabalaga wa Chelsea.

Ni igitego gisa n’icyaciye intege burundu abasore b’umutoza Frank Lampard, bituma Liverpool ikomeza kubarusha.

Chelsea yashoboraga kubona igitego cyari kuyigarura mu mukino ku munota wa 73, gusa amahirwe ya penaliti yabonye Jorginho ayatera intoki.

Ni penaliti yakuwemo n’umuzamu Alison Becker, nyuma y’ikosa Thiago yari amaze gukorera kuri Werner.