Abaturage bo mu Kagari ka Rugenge, mu Murenge wa Muhima, Akarere ka Nyarugenge mu Mujyi wa Kigali, baranenga uburyo bafungiwe mu Kagari, bazira kutishyura amafaranga y’umutekano. Ibi babifata nk’akarengane.
Ku biro by’aka Kagari ka Rugenge hari abaturage barimo abagore n’umusaza bari mu cyumba cy’aka kagari bacunzwe n’Abanyerondo hafi aho hari n’abashinzwe umutekano mu rwego rwa DASSO.
Mu buhamya butangwa na bamwe muri aba baturage bagaragaza ko mu masaha y’igicuku cya Saa cyenda babonye zimwe mu nzego z’umutekano zirimo Abanyerondo, Dasso, Inkeragutabara zibakomangira ku nzu batuyemo.
Bahitaga babatwara uko bameze kose, bakaberekeza ku biro by’aka kagari kubafungira yo.
Ku ruhande rwabo batangarije Radiotv Flash ko ari ihohoterwa bakorewe.Uwitwa Murekatete Agnes aragira ati “Badukomangiye mu gicuku, ni ihohoterwa, nk’ubu nari mfite gahunda yo kujya kuvuza umwana, ntaho nagiye, wogaga mu maso baguhagaze hejuru.”
Undi nawe aragira ati “Baje saa cyenda z’ijoro mu rugo bakomanze nyine dutinda kubafungurira, naje gufungura nka saa kumi n’imwe ngiye hanze bahita bambwira bati ntabwo usubira mu nzu. Nagiye no mu bwiherero, umunyerondo ansangamo ati sohoka tugende.”
Bemeza ko aho bari bacunzwe bikomeye n’Inkeragutabara, ntibemerewe gusohoka ngo bajye kwiherera ndetse no gukoresha telefone zabo basaba izindi mbaraga.
Uwitwa Samantha aragira ati “Ndizera neza ko nawe ubyiboneye (abwira umunyamakuru) uriya ni umwana unzaniye kano ka reà§u (Inyemezabwishyu) kari kari mu rugo. Nibagaragaze niba hano ari muri gereza tubimenye, nonese kwirirwa twicaye aha ngaha turimo turayakorera? Ni ikibazo!”
Murekatete Agnes aragira ati “Turasaba ubuvugizi, bajye baza kwishyuza neza, baza bavuga nabi bariya Banyerondo bakenda no kugubita.”
Aba bavuga ko bafungiye ku biro by’Akagari babarirwa muri batandatu biganjemo abagore n’abagabo, harimo abafite abana ndetse n’abandi batwite.
Ubuyobozi bw’Akagari ka Rugenge bwemeza ko aba bose bananiwe kwishyura amafaranga y’irondo ngo bagiye gukora irondo ryo ku manywa kugira ngo bihwaniremo n’amafaranga bagombaga gutanga.
Umunyamabanga Nshingwabikorwa w’aka kagari, Muhawenimana Fran ৠoise avuga ko bazajya bakora ibikorwa by’irondo iminsi ine mu cyumweru.
Aragira ati “Igihe cyose babona badafite ubwo bushobozi, urumva rero bagomba gukora irondo ku manywa iminsi ine mu cyumweru, bishobora kuzaba nk’iminsi cumi n’itandatu mu kwezi. Mu byo bakora harimo gukurikirana ku bikorwa biri kuba, haba hari uhungabanije umutekano bakahagera, bagafatanya n’ubuyobozi bw’umudugudu. Hakaba n’Abanyerondo bamwe tuba turi kumwe hano ku kagari mu rwego rwo gufatanya imirimo imwe n’imwe igendanye n’umutekano.”
Aba baturage bivugwa ko bafungiye ku biro biganjemo abari mu cyiciro cya mbere cy’ubudehe, aba bishyuzwa amafaranga 500 buri kwezi. Abo mu cya Kabiri ni 1000, icya Gatatu ni 2000 naho icya Kane akaba 4000Frs.
