Minisiteri y’Ubutegetsi bw’Igihugu, MINALOC, kuri uyu wa kane yakuye muri gahunda ya Guma mu Rugo imidugudu itatu yo mu tugari tubiri two mu murenge wa Kigarama mu karere ka Kicukiro, iyishyiramo amasibo atatu yo mu mudugudu wa Kabutare, mu kagari ka Bwerankori ho muri uriya murenge wa Kigarama.
Minisiteri y’Ubutegetsi bw’Igihugu mu itangazo ryayo, yavuze ko ibi byemezo bizatangira gushyirwa mu bikorwa ku wa gatanu tariki ya 31 Nyakanga.
Ni ibyemezo byafashwe hashingiwe ku “busesenguzi bw’icyorezo cya Covid-19 mu mujyi wa Kigali.”
Imidugudu yakuwe muri gahunda ya Guma mu Rugo ni uwa Kamabuye na Zuba yo mu kagari ka Nyarurama ho mu murenge wa Kigarama mu karere ka Kicukiro, ndetse n’umudugudu wa Nyenyeri (Igice yo hepfo y’umuhanda kigizwe n’amasibo 13) uherereye mu kagari ka Bwerankori ho mu murenge wa Kigarama.
Imidugudu yagumye muri Gahunda ya Guma mu Rugo ni itatu yo mu kagari ka Tetero mu murenge wa Muhima, mu karere ka Nyarugenge, irimo uwa Tetero, Indamutsa ndetse n’umudugudu w’Intiganda.
Ni imidugudu yiyongeraho amasibo atatu arimo iy’Ubutwari, Icyerekezo ndetse n’isibo yo Gukunda Igihugu; yose yo mu mudugudu wa Kabutare mu kagari ka Bwerankori, ho mu murenge wa Kigarama mu karere ka Kicukiro.
Minisiteri y’Ubutegetsi bw’Igihugu yavuze ko imidugudu iri muri Gahunda ya Guma mu Rugo izayivanwamo igihe isesengura ry’inzego z’ubuzima zizagaragaza ko nta cyorezo cya Covid-19 kikiyirangwamo.
Gushyira muri gahunda ya Guma mu Rugo imidugudu imwe n’imwe yo mu mujyi wa Kigali ndetse no hirya no hino mu gihugu yagaragayemo icyorezo cya Covid-19, biri mu ngamba Leta y’u Rwanda yafashe mu rwego rwo kwirinda ko icyo cyorezo cyakwirakwira hose.
Ni icyorezo mu Rwanda kwandurwa n’ababarirwa mu 1,994 nk’uko imibare ya Minisiteri y’Ubuzima ibigaragaza, barimo batanu kimaze guhitana na 1,085 bamaze kugikira.
