Franck Diongo, umunyapolitiki utavuga rumwe n’ubutegetsi ushyigikiye Moise Katumbi muri aya matora aheruka, kuri uyu wa Kabiri, itariki 26 Ukuboza, yahamagajwe n’ubushinjacyaha ku Rukiko rw’Ubujurire rwa Kinshasa ngo ahatwe ibibazo ku byaha akurikiranweho.
“Nananirwa kubikora (kwitaba), azabihatirwa nk’uko biteganywa n’amategeko,” ibi ni ibikubiye mu butumwa bumuhamagaza bwo kuri uyu wa Mbere ushize, itariki 25 Ukuboza bwavuye mu biro by’ubushinjacyaha bwa leta.
Iyi nkuru dukesha Kivumorningpost yibutsa ko abashyigikiye Diongo baherutse gukozanyaho, muri Komini Ngaliema, i Kinshasa, n’impirimbanyi zo muri Force du progress, urwego bikekwa ko ari urw’ishyaka UDPS riri ku butegetsi.
Urubyiruko rwo mu ishyaka rya Diongo (MLP) rwafashe iki gikorwa nko gukoresha ubutabera k’ubutegetsi, rufata icyemezo cyo guherekeza umuyobozi wabo ku bushinjacyaha nk’uko byemejwe n’Umunyamabanga Nshingwabikorwa w’ishyaka.
Iyi nkuru ikaba yibutsa kandi ko Franck Diongo yari yatawe muri yombi kuwa 19 Kamena muri uyu mwaka akoherezwa muri Gereza ya Gisirikare ya Ndolo mbere yo kurekurwa ku itariki 15 Nyakanga.
