Bamwe mu Banyekongo basenyewe amahema bari bashinze mu karere ka Kisoro muri Uganda, nyuma yo kwanga kwimukira mu nkambi ya Nyakabande, basubiye muri Repubulika ya Demukarasi ya Congo (RDC).
Tariki ya 2 Nzeri ni bwo inzego zishinzwe umutekano za Uganda zasenyeye izi mpunzi zaturutse i Bunagana, nyuma y’igihe kinini zisabwa kwimukira mu nkambi.
Zari zasobanuriwe ko zitemerewe kuba ahatari mu nkambi kuko bitemewe n’amategeko, kandi ko izitazemera kwimukira i Nyakabande zizasubira muri RDC.
Amakuru yatangajwe n’umunyamakuru Martial Papy Mukeba wa Radio Okapi avuga ko byibuze imiryango 600 y’impunzi z’Abanyekongo yasesekaye muri Rutshuru-Centre, inyuze ku mupaka wa Kitagoma.
Izi mpunzi zahunze imirwano y’ingabo za RDC n’umutwe witwaje intwaro wa M23 wafashe Bunagana tariki ya 13 Kamena 2022.
