Kuri uyu wa Gatatu, Komisiyo y’u Burayi yasanze ibihangange mu ikoranabuhanga Apple na Meta bitarubahirije inshingano zishingiye ku itegeko rigenga isoko ry’ibihugu by’u Burayi (DMA), ihanisha amasosiyete yombi yo muri Amerika kwishyura amande ya miliyoni 500 € (miliyoni 572 $) na miliyoni 200 €.
Isosiyete ya Apple yasanzwe yararenze ku nshingano zayo za “anti-steering” ziteganywa muri DMA, mu gihe Meta yasanzwe idaha abakiriya amahitamo ya serivisi ikoresha make mu makuru yabo bwite, nk’uko na none biteganywa mu masezerano ya DMA nk’uko tubikesha Euronews.
“Anti-steering obligation” ni amategeko abuza abakora porogaramu kumenyesha abayikoresha uburyo bw’ifatabuguzi buhendutse hanze ya porogaramu, cyangwa gutanga links kuri ayo mahitamo.
Ku rundi ruhande ariko, Umuryango w’Ubumwe bw’ibihugu by’u Burayi nawo wahagaritse iperereza kuri Apple ku nshingano z’amahitamo y’abakiriya bayo nyuma y’uko iki gihangange mu ikoranabuhanga cyubahirije DMA cyoroshya uburyo bwo guhitamo browser wifuza gukoresha ndetse n’abakoresha bakabasha gukuraho porogaramu zashyizweho mbere nka Safari.
