Ikipe ya Atletico Madrid yaraye itsinze FC Barcelona igitego 1-0 mu mukino w’umunsi wa 10 wa shampiyona ya Espagne, iba incuro ya mbere Simeone atsinze iriya kipe muri shampiyona ya Espagne mu kuva bahura bwa mbere mu myaka 10 ishize.
FC Barcelona yari yasuye Atletico Madrid ku kibuga Wanda Metropolitano, gusa idafite abarimo Ansu Fati na Sergio Busquets bavunikiye mu kipe y’igihugu ya Espagne.
Atletico Madrid yo yaburaga Luis Suarez wanduye icyorezo cya Covid-19 cyamubujije gukina n’ikipe yahozeho.
Igitego rukumbi cyabonetse muri uyu mukino kinjiye mu minota itatu y’inyongera yari ishyizwe ku gice cya mbere, gitsinzwe n’Umubiligi Yannick Ferreira Carasco.
Hari ku makosa y’umuzamu Marc-Andre Ter Stegen warenze urubuga rwe ajya gukiza izamu, birangira umupira awuhushije.
FC Barcelona yagaragaje urwego rwo hasi cyane ku buryo nta buryo bwinshi bukanganye yigeze irema imbere y’izamu rya Atletico, na buke bworoheje yagiye ibona nta cyugazi bwigeze buteza umuzamu Jan Oblak.
Diego Simeone nk’umutoza wa Atletico Madrid yari amaze guhura na FC Barcelona muri shampiyona incuro 17, akaba yari yaratsinzwe 11 muri zo mu gihe izindi esheshatu Atletico Madrid yari yaragiye izinganyamo na Barça.
Gutsinda FC Barcelona byatumye Atletico Madrid ifata umwanya wa kabiri muri shampiyona n’amanota 20, inganya na Real Sociedad ya mbere.
Cyakora cyo Atletico imaze gukina imikino umunani, mu gihe Real Madrid imaze gukina 10.
FC Barcelona na yo imaze gukina imikino umunani iri ku mwanya wa 10 n’amanota 11, ikaba irushwa na Real Madrid ya kane amanota atandatu.
