Leta y’u Burundi yemeje amakuru amaze iminsi avugwa ko abasirikare bayo batandatu biciwe muri Somali, aho bari mu butumwa bwo kugarura amahoro.
Ni abasirikare batandatu b’u Burundi, biciwe mu gitero bagabweho muri Somalia, mu Murwa Mukuru wa Magadishu, aho bari mu butumwa bw’Umuryango wa Afurika Yunze Ubumwe bwo kugarura amahoro (AMISOM).
Umuvugizi w’igisirikare cy’u Burundi, Col.Floribert Biyereke yemeje aya makuru agira ati “Ni umutwe w’iterabwoba wa Al-Shabaab wagabye igitero ku basirikare b’u Burundi muri Somalia bari mu butumwa bw’amahoro (AMISOM) mu Karere ka Balad, kari mu bilometero 30 uvuye mu Majyaruguru y’Uburasirazuba bw’umujyi wa Magadishu”.
Col.Floribert Biyereke watangaje aya makuru ku Cyumweru tariki ya 28 Nyakanga 2019, avuga ko aba basirikare bahise bapfira aho igitero cyagabwe, abandi batatu bakomereka mu buryo bukomeye, hakaba n’abasirikare babiri baburiwe irengero.
Ikinyamakuru Regionweek gitangaza ko iki gitero cyagabwe nyuma y’iminsi mike nabwo abantu batandatu bishwe barimo abakomiseri babiri b’uturere, bakaba barapfiriye mu gitero cy’ubwiyahuzi cyabereye ku nyubako ya Leta iri mu murwa mukuru, cyaje kwigambwa na Al-Shabaab.
