Ikipe ya Liverpool yongeye kwerekana ko ari umukandida ukomeye ku gikombe cya Shampiyona y’Abongereza y’uyu mwaka, nyuma yo gutsinda Arsenal ibitego 3-1, mu mukino wabaye mu ijoro ryakeye.
Bakinaga umukino w’umunsi wa gatatu wa shampiyona wabereye ku kibuga Anfield Road.
Ni umukino wa gatatu wikurikiranya iyi kipe y’umutoza Jurgen Klopp itsinze kuva shampiyona yatangira, bikayishyira ku mwanya wa kabiri ku rutonde rwa shampiyona aho inganya amanota icyenda na mukeba wayo, Everton.
Alexandre Lacazette yafunguriye Arsenal amazamu ku munota wa 25 ku ikosa ryari rikozwe na Andrew Robertson, gusa iminota itatu yonyine yari ihagije ngo Sadio Mané yishyure icyo gitego.
Liverpool yari iri hejuru cyane ntibyayisabye iminota myinshi ngo ibone igitego cya kabiri cyatsinzwe na Robertson wahise asiba ikosa rya kado yari yahaye Lacazette.
Uyu Lacazette yashoboraga kwishyurira Arsenal mu minota ya nyuma y’umukino, gusa amakosa yakoze yahise akosorwa na Diogo Jota wahise atsindira Liverpool igitego cya gatatu, ku munota wa 88 w’umukino.
Arsenal yahise ifata umwanya wa gatanu ku rutonde rwa shampiyona nyuma yo gutakaza umukino wa mbere muri iyi shampiyona.
