Umuryango w’Ibihugu bikoresha Ururimi rw’Igifaransa (OIF) kuri uyu wa Gatatu, itariki 20 Gashyantare watangaje ko Umunyamabanga Mukuru wawo, Louise Mushikiwabo yohereje muri Senegal intumwa zigomba kuzakurikirana igikorwa cy’amatora y’umukuru w’igihugu ateganyijwe kuwa 24 Gashyantare muri iki gihugu.
Ni itsinda ry’intumwa riyobowe n’uwahoze ari Minisitiri w’Intebe wa Sao Tome na Principe, Patrice Emery Trovoada, rikaba rigizwe n’umudepite, abanyapolitiki, n’impuguke zo ku rwego rwo hejuru zikomoka mu bihugu bigize francophonie.
Iyi nkuru dukesha urubuga rw’umuryango wa OIF iravuga ko izi ntumwa zatangiye gusura Senegal guhera kuwa 19 zikazageza kuwa 26 Gashyantare nk’uko itangazo ryashyizwe ahagaragara rivuga.
Biteganyijwe ko bazaganira n’abayobozi ba Senegal, abakandida, inzego zishinzwe kugenzura amatora, imiryango ya sosiyete sivile n’abandi bazaba bagiye gukurikirana amatora bazaba bahari ndetse n’abafatanyabikorwa mpuzamahanga bakorera muri Senegal.
Ibyo izi ntumwa zizabona muri Senegal nibyo bizatuma umuryango wa Francophonie umenya niba amatora yarateguwe neza ku buryo byakwifashishwa mu gusangira ubunararibonye bw’imikorere myiza mu bindi bihugu bikoresha ururimi rw’Igifaransa.
Bijyanye na Déclaration ya Bamako, Francophonie yashimangiye ko izatanga umusanzu wayo ku bihugu biyigize kugirango bijye bibamo amatora akozwe mu bwisanzure, yizewe kandi akozwe mu mucyo.
Senegal akaba ari kimwe mu bihugu 54 bigize umuryango wa OIF, kongeraho birindwi by’ibinyamuryango ariko mu buryo bucagase, ndetse na 27 birimo nk’indorerezi byose hamwe bikaba 84.
