Umukinnyi wo hagati mu ikipe ya West Ham, Lucas Paquetá yabatirijwe mu rugo rwe mu gihe agitegereje umwanzuro w’Ishyirahamwe ry’Umupira w’Amaguru mu Bwongereza (FA) ku byaha aregwa byo gushaka kubona amakarita y’umuhondo ku bushake kugira ngo bigire ingaruka ku isoko ry’imikino y’amahirwe.
Paquetá, ukomoka muri Brazil, ashinjwa ko yaba yarakoze amakosa agamije guhabwa amakarita y’umuhondo mu mikino ine ya shampiyona, bikaba byaratangiye gukorwaho iperereza kuva muri Kanama 2023. Yatangajwe ku mugaragaro nk’uregwa muri Gicurasi 2024, ariko icyemezo cya nyuma gitegerejwe mu byumweru bine cyangwa umunani biri imbere.
Ibi birego aregwa byahagaritse igurwa rye mu ikipe ya Manchester City ku gaciro k’amapawundi miliyoni 80. Mu gihe cyose iki kibazo kimaze, Paquetá yakomeje kuvuga ko ari umwere.
Mu gihe akomeje guhangana n’aya makuba, Paquetá yafashe icyemezo cyo kwiyegurira Imana abinyujije muri batisimu, umuhango wabereye mu rugo iwe, aho yari kumwe n’umugore we Maria Fournier n’inshuti ye Pedro Guilherme, ukinira Flamengo. Maria Fournier yavuze ko umugabo we “yabaye icyaremwe gishya muri Kristo.”
