Umutwe witwaje intwaro wa M23 ukekwaho kugaba igitero ku barinda Pariki ya Virunga, ahaherera mu gace ka Bukima, Gurupoma ya Jomba, Teritwari ya Rutshuru muri Repubulika ya Demukarasi ya Congo mu ijoro ry’uyu wa 20 Ugushyingo 2021.
Urwego rushinzwe kubungabunga ibidukikije muri RDC, ICCN rwatangaje ko abarwanyi b’uyu mutwe babarirwaga mu 10, bagabiye igitero hafi n’u Rwanda na Uganda.
Mu itangazo rwashyize hanze, rwagize ruti: “Igitero cyari gikomeye. Cyarimo abarwanyi babarirwa mu 100 bari bafite intwaro. Abakekwa ni abahoze ari abarwanyi ba M23 bisuganyirije ku mupaka [uhuza u RDC], u Rwanda na Uganda bashakaga gushyira ibirindiro muri Pariki y’Igihugu ya Virunga.”
Yakomeje iti: “Aba bantu bagabye igitero kuri post y’uburinzi ya ICCN, barahava bajya muri Jomba na Bunagana. FARDC, yahagobotse, hapfamo bamwe babo…”
Mu barinda iyi Pariki, hapfuye umwe, mu gihe abandi 5 bakomerekeye muri iyi mirwano n’abitwaje intwaro.
Iki ni igitero cya kabiri M23 ivuzweho muri uku kwezi, nyuma y’ikindi cyagabwe na none muri Teritwari ya Rushuru tariki ya 8 Ugushyingo 2021, kigatuma ababarirwa mu bihumbi bahungira muri Uganda. Gusa abahagarariye abarwanyi b’uyu mutwe barambitse intwaro, bahakanye uruhare rwabo muri iki gitero.
