Umutwe wa AFC/M23 ku Cyumweru tariki ya 23 Ugushyingo 2025, wigaruriye Umujyi muto wa Buhimba wo muri Groupement ya Waloa Yungu ho muri Teritwari ya Walikale mu ntara ya Kivu y’Amajyaruguru, nyuma yo kuwirukanamo ihuriro ry’Ingabo za Leta ya Repubulika Iharanira Demokarasi ya Congo.
Actualite.CD igaragaza Buhimba nk’amatware akomeye ya nyuma ingabo za Leta ya RDC n’abarwanyi ba Wazalendo basanzwe bazifasha ku rugamba bari basigaranye muri Teritwari ya Walikale.
Amakuru avuga ko ingabo za AFC/M23 zikigera muri Buhimba zahise zitwika amakambi yose y’Ingabo za Kinshasa na Wazalendo.
Amakuru kandi avuga ko ingabo za leta nyuma yo kwirukanwa muri kariya gace zahise zihungira ahitwa Kailenge na Luhando.
Ifatwa rya Buhimba ryahise rifungurira AFC/M23 amarembo yo kwerekeza muri Kimua na Ntoto, indi mijyi ibiri mito ikomeye iri muri Groupement ya Waloa Yungu muri iki gihe igenzurwa n’ingabo za Leta na Wazalendo.
Ifatwa rya Buhimba ryiyongereye ku rya Mahanga na Kibanda, imijyi mito yo muri Teritwari ya Walikale AFC/M23 yigaruriye mu mpera z’icyumweru gishize.
