Mageragere: Inzu zirenga 100 zahawe amashanyarazi aturuka kumirasire y'izuba

Minisitiri mu Biro by’Umukuru w’Igihugu, Tugireyezu Venantia yasabye imiryango igize ingo 114 ituye mu mudugudu wa Mpanga, akagari ka Runzenze, Umurenge wa Mageragere, ho mu karere ka Nyarugenge, gufata neza amashanyarazi bahawe na Polisi y’u Rwanda no kuyabyaza umusaruro.

Ibi Minisitiri Tugireyezu yabibabwiye ku wa kabiri tariki 23 Gicurasi mu muhango wo gutaha ku mugaragaro ayo mashanyarazi bagejejweho na Polisi muri gahunda ngarukamwaka y’ibikorwa by’ukwezi byayo byatangiye ku itariki 16 z’uku Kwezi bizasozwa n’isabukuru yayo y’impaka 17.

Mu bitabiriye uwo muhango harimo Umuyobozi w’Umujyi wa Kigali, Pascal Nyamurinda, Commissioner of Police (CP) Dr Daniel Nyamwasa; akaba yari ahagarariye Ubuyobozi Bukuru bwa Polisi y’u Rwanda , Umuyobozi w’akarere ka Nyarugenge, Kansiime Nzaramba, na bamwe mu bofisiye bakuru ba Polisi y’u Rwanda barimo Umuyobozi wayo mu Mujyi wa Kigali, Assistant Commissioner of Police (ACP) Rogers Rutikanga.

Umwe mu baturage bahawe amashanyarazi ashimira Polisi y’u Rwanda

Mu ijambo yagejeje ku bihumbi by’abaturage bitabiriye icyo gikorwa barimo n’abagejejweho amashanyarazi, Minisitiri Tugireyezu yagize ati,”Iki gikorwa cya Polisi cyo kugeza amashanyarazi ku ngo 114 zo muri uyu mudugudu ndetse n’Ibiro by’akagari ni igikorwa cy’indashyikirwa. Ba nyirazo ntibazongera kuba mu kizima.Ntibazongera kandi gucana buji n’udutadowa byashoboraga gutera ibibazo birimo inkongi z’imiriro.”

Yasabye abayahawe kuyafata neza kugira ngo arambe no kuyabyaza umusaruro biteza imbere mu buryo butandukanye.

Yakomeje agira ati,”Mu byo Polisi ikora mu kwezi kw’ibikorwa byayo harimo kwigisha urubyiruko kutishora mu biyobyabwenge, gukangurira abatwara ibinyabiziga kubahiriza amategeko y’umuhanda hagamijwe gukumira impanuka, no gushishikariza umuryango nyarwanda kwitabira umugoroba w’ababyeyi. Turayishima cyane ku bikorwa nk’ibi bigamije guteza imbere abaturage no kubakangurira kwirinda ibyaha.”

Mu butumwa bwe, Umuyobozi w’Umujyi wa Kigali yagize ati,” Ibikorwa nk’ibi byunganira gahunda z’igihugu zigamije iterambere ryihuse kandi rirambye. Ibi bigamije kwishakamo ibisubizo nk’uko tubikangurirwa buri gihe na Nyakubahwa Perezida wa Repubulika.”

Yongeyeho agira ati,”Umutekano ni ishingiro ry’iterambere rirambye duharanira kugeraho. Ibyo biha buri wese inshingano wo gufatanya gukumira ikintu cyose cyawuhungabanya. Icyo buri wese asabwa ni ukwirinda ibyaha no kuyitungira agatoki abo abikekaho.”

CP Dr Nyamwasa yabwiye abaturage bari aho ati,” Ibikorwa bya Polisi ntibigarukira ku gucunga umutekano w’abantu n’ibyabo; ahubwo ifatanya n’izindi nzego ndetse n’abaturage mu bikorwa by’iterambere birimo ibi twatashye uyu munsi; kandi imikoranire yayo myiza n’abaturage ni byo bituma isohoza inshingano zayo neza. Turabasaba kwirinda ibyaha no kuba abafatanyabikorwa mu kubirwanya mutanga amakuru ku gihe atuma bikumirwa no gufata ababikoze.”

Yakomeje agira ati,”Imiryango yahawe amashanyarazi isezeye ku gukubita umutwe ku bikuta by’inzu kubera umwijima. Abana ntibazongera kugira imbogamizi zo gusubira mu masomo igihe bwije. Murasabwa kubungabunga ibi bikorwa kugira ngo birame.”

Ibyishimo ku bahawe amashanyarazi

Mukandayisaba Jeanne D’Arc, umubyeyi w’umuryango w’abantu bane yagize ati,“Sinkigenda ibirometero n’ibirometero njya gushyirisha umuriro muri telefone. Singitinya kandi gusohoka nijoro bitewe n’uko hanze haba habona. Ndashima Polisi yacu yatugejejeho amashanyarazi.”

Umucuruzi witwa Hakizimana Jean Bosco yagize ati, “Nahoraga mfite impungenge z’uko buji ishobora gutera inkongi mu iduka ryanjye; none Polisi yashubije ukwifuza kwanjye ingezaho amashanyarazi; kandi nzayafata neza.”

Ibikorwa bya Polisi byakomereje kandi mu karere ka Ngororero ku munsi wa munani w’Ukwezi kwayo; aho yafatanyije n’abaturage ndetse n’izindi nzego guhanga umuhanda ureshya na kilometero imwe uhuza imidugudu ya Rutsiro na Sereri yo mu kagari ka Gatega, mu murenge wa Hindiro.

Polisi yashyikirije kandi inyemezabwishyu z’umusanzu w’ubwisungane bwo kwivuza imiryango 33. Ubwo bufasha bwatanzwe n’abapolisi bakorera muri aka karere bafatanyije n’Abanyamuryango b’Ihuriro ry’Urubyiruko rw’Abakorerabushake mu gukumira ibyaha rwo muri aka karere.

Ibihumbi by’abaturage bitabiriye uwo muganda bahawe ubutumwa bwo kwirinda amakimbirane, kwirinda kwishora mu biyobyabwenge , kuba ijisho ry’umuturanyi, no kwitabira gahunda za Leta zigamije iterambere n’umutekano birambye; ibi bakaba barabikanguriwe n’Umuyobozi wa Polisi muri aka karere, Senior Superintendent of Police (SSP) Marc Gasangwa afatanyije n’Umuyobozi w’aka karere wungirije ushinzwe ubukungu n’iterambere, Kanyange Christine.