Abacuruzi babiri b’impunzi mu gihugu cya Malawi, Umurundi n’Umunyekongo, basanzwe bapfuye, mu gitondo cyo kuri uyu wa Kabiri ushize hafi y’inkambi ya Dzaleka, mu buryo bwateje impungenge n’umujinya mu baturage.
Abatangabuhamya bavuga ko abapfuye, bari mu myaka mirongo itatu, bavuye mu nkambi ku Cyumweru gishize bagiye kurangura ibicuruzwa mu mujyi rwagati. Ntibigeze basubirayo ku gihe bagombaga gusubirirayo.
Bukeye, imiryango yabo yabimenyesheje abayobozi nyuma yo kubona ko baburiwe irengero. Imibiri yasanzweho ibimenyetso by’ibikomere, byerekana ko bahohotewe mbere yo kwicwa. Amafaranga bari bafite na yo yaribwe nk’uko inkuru dukesha SOS Medias Burundi ivuga.
Umwe mu bagize umuryango w’Umurundi wishwe yagize ati: “Twabanje kugira impungenge igihe batagaragaraga kuva ku Cyumweru. Bukeye, twamenyesheje abayobozi, hanyuma basanga bapfuye mu gitondo cyo kuri uyu wa Kabiri, bigaragara ko banizwe. Turasaba ko hakorwa iperereza kugira ngo hamenyekane abakoze ubwo bwicanyi bubiri”.
Ubu bwicanyi bubiri bugaragaza umutekano muke mu karere ka Dowa, aho inkambi ya Dzaleka iherereye icumbikiye impunzi zirenga 50.000, harimo Abarundi barenga 11.000.
Amakuru aturuka muri ako karere yerekana ko ubugizi bwa nabi bukunze kuhagaragara kandi impunzi zigirwa inama yo kwirinda ingendo za kure nijoro.
