Ubutegetsi bw’inzibacyuho bwa Repubulika ya Mali bwamaganiye kure ibihano biremereye umuryango wa Afurika y’Uburengerazuba, ECOWAS, uherutse gufatira iki gihugu, unihimura ku bihugu biwugize.
Tariki ya 9 Mutarama 2022 ni bwo abakuru b’ibihugu bigize ECOWAS bateraniye muri Ghana, baganira ku butegetsi bwa Mali buyobowe na Col. Assimi Goïta bwari buherutse gusaba ko bwakwemererwa bukayobora kugeza mu 2025, bukabona gukoresha amatora.
Banzuye ko bafatiye ibihano iki gihugu birimo gufunga imipaka igihuza n’ibindi bigize ECOWAS; yaba iyo ku butaka no mu kirere, kwirukana abadipolomate bayo muri ibi bihugu, gufatira umutungo wayo uri muri Banki y’uyu muryango no kuyihagarikira inkunga zituruka mu muryango.
Uyu mwanzuro bawufashe mu rwego rwo gushyira ku gitutu aba basirikare, kugira ngo bihutishe imyiteguro y’amatora, iki gihugu cyongere kuyoborwa binyuze mu nzira ya demukarasi.
Inkuru y’ibihano bya ECOWAS kuri Mali https://bwiza.com/?ECOWAS-yafatiye-Mali-ibihano-biremereye-mu-gushyira-ku-gitutu-Col-Goita
Gusa Umuvigizi w’ubutegetsi bw’inzibacyuho bwa Mali, Col. Abdoulaye Maiga mu butumwa bwatambutse kuri televiziyo y’igihugu kuri uyu wa 10 Mutarama, yamaganiye kure ibi bihano bya ECOWAS. Ati: “Guverinoma ya Mali iramaganira kure ibi bihano bitemewe n’amategeko.”
Col. Maiga yongereyeho ko na bo ubutegetsi bwa Mali bugiye kwihimura ku bihugu bigize uyu muryango, buhamagare abadipolomate bayo bari yo no gufunga imipaka iyihuza nabyo (bisa n’ibya ECOWAS). Yagize ati: “Mu buryo bwa magirirane, Mali yafashe icyemezo cyo gutumizaho ba Ambasaderi bayo, ikanafunga imipaka yo ku butaka no mu kirere iyihuza n’ibihugu birebwa n’iki cyemezo.”
ECOWAS yifuza ko amatora ya Mali yaba bitarenze tariki ya 27 Gashyantare 2022.
