Umuririmbyi w’indirimbo zihimbaza Imana wo muri Tanzania, Rose Muhando, kuri uyu wa 6 Werurwe 2022 yatangaje ko umubyeyi we yavukiye mu Rwanda.
Muhando wamamaye cyane kuva mu karere ka Afurika y’iburasirazuba mu myaka irenga 15 amaze kuri uyu murimo, yabitangarije mu gitaramo Rwanda Gospel Stars Live cyaraye kibereye i Rebero, kuri Canal Olympia.
Uyu muririmbyi yamenyesheje abitabiriye iki gitaramo ko iyo ari mu Rwanda aba yishimye cyane, kubera ko ahafata nko mu rugo. Ati: “Reka mbabwire bantu b’i Kigali. Ibyishimo byanjye biterwa n’uko Mama wanjye wavukiye muri iki gihugu. Iyo ndi hano, mba numva ndi mu rugo. Ndishimye cyane cyane cyane.”
Mu gushimangira isano afitanye n’Abanyarwanda, Muhando yaririmbye akaririmbo gato kamamaye mu rurimi rw’Ikinyarwanda ndetse n’Ikirundi, kagira kati “Iyo Mana dusenga irakomeye.”
Rose Muhando yamamaye mu ndirimbo yakoze zo mu rurimi rw’Igiswahili, zirimo : Nibebe, Utamu wa Yesu, Nipe Uvumilivu na Jipange Sawa Sawa.
