Ikipe ya Manchester United yakoze ibitatekerezwaga (na benshi), itsinda Liverpool mu mukino w’umunsi wa gatatu wa shampiyona y’Abongereza.
Man United yari yakiriye Liverpool i Old Trafford, mu mukino w’umunsi wa gatatu wa Premier league.
Ni umukino iyi kipe y’umutoza Erik ten Haag yari yakiriyemo Liverpool abenshi batayicira akari urutega, bijyanye n’uburyo yatangiyemo shampiyona.
Gutangira shampiyona itsindwa na Brighton ibitego 2-1 mbere yo gusuzugurwa na Brentford ikayinyagira ibitego 4-0, abenshi bumvaga Manchester United imbere ya Liverpool ishobora kurya umuba w’ibitego bijyanye no kuba iyi kipe y’umutoza JĂĽrgen Klopp na yo ikomeje kugorwa n’intangiriro za shampiyona ikunzwe kurusha izindi ku Isi.
Umunota wa 16 w’umukino wari uhagije kugira ngo Manchester United yakinnye umupira udasanzwe ifungure amazamu biciye kuri Jason Sancho.
Ni Man United yari itandukanye cyane n’iyo abenshi bari bamenyereye, ku buryo na Garry Neville yatunguwe n’umupira wotsa igitutu Liverpool ikipe ye yaraye ikinnye.
Uyu Mwongereza wahoze ari myugariro wa Manchester United yabwiye Monday Night Football ko atizera ibyo amaso ye yaraye amweretse bitewe n’uburyo Manchester yaraye yitwaye.
Iyi kipe ifite ibikombe byinshi kurusha andi mu Bwongereza yatsinze igitego cya kabiri ku munota wa 53 biciye kuri Marcus Rashford, ku mupira mwiza yari acomekewe n’Umufaransa Anthony Martial.
Liverpool yabonye impozamarira ku munota wa 81 biciye ku munya-Misiri Mohamed Salah wahise unaca agahigo ko kuba umukinnyi wa mbere mu mateka utsinze Manchester United ibitego 10 akinira Liverpool.
Gutsinda Liverpool byakuye Manchester United ku mwanya wa nyuma ihita ifata uwa 14 n’amanota atatu.
