Igihugu cya Tanzania kirashinja abantu bitwaje intwaro bava mu Burundi guteza umutekano mucye ku butaka bwacyo. Ibi akaba ari ibyatangajwe na Minisitiri w’Intebe wa Tanzania, Kassim Majaliwa kuwa Gatandatu ushize, itariki 16 Gashyantare, ubwo yari i Kigoma.
Minisitiri w’Intebe Majaliwa yari mu nama n’abagize ishyaka riri ku butegetsi muri Tanzania, Chama Cha Mapinduzi (CCM).
Nk’uko byatangajwe na televiziyo y’iki gihugu yitwa ITV, Kassim Majaliwa yakomoje ku dutsiko tw’abantu bitwaje intwaro bakomoka mu Burundi bacengeye muri Kigoma, intara yubatsemo inkambi z’impunzi z’Abarundi zigera kuri eshatu.
Minisitiri w’Intebe wa Tanzania ati: “ Ni guverineri wa Kigoma watubwiye ibi. Hari intwaro nyinshi zinjiye mu karere ka Kigoma. Izi ni intwaro abaturage badakoresha…zafatiwe Kasulu, Kibondo na Kakonko. Ibi bice bihana imbibi n’u Burundi. Hari kandi ibikorwa by’ubujura bwitwaje intwaro, gushimuta abana bakarekurwa hatanzwe ingurane, n’ibindi .”
Minisitiri w’Intebe Majaliwa yakomeje agira ati: “ Tanzania ntishobora kubuza abakunzi, inshuti, n’abaturanyi kuza gukora cyangwa gutura iwacu. Ariko hagomba kubaho itegeko .”
Ibi byavuzwe mu gihe impunzi z’Abarundi zo mu nkambi za Nduta na Mtendeli ziherutse gutaka gucengerwamo n’abantu bitwaje intwaro bava mu Burundi ubwo zasurwaga na komiseri Mukuru wa HCR mu cyumweru gishize.
