Ikipe ya Zamalek y’i Cairo mu gihugu cya Misiri, yaraye ikatishije itike yo gukina umukino wa nyuma wa CAF Champions League, ihasanga mukeba wayo Al Ahly ku nshuro ya mbere mu mateka.
Zamalek yageze ku mukino wa nyuma wa CAF Champions League nyuma yo gusezerera muri 1/2 cy’irangiza ikipe ya Raja Casablanca yo muri Maroc ku giteranyo cy’ibitego 4-1.
Abanya-Maroc bari batsinzwe na Zamalek igitego 1-0 mu mukino ubanza wabereye iwabo, gusa mu wo kwishyura banyagirirwa mu Misiri ibitego 3-1.
Raja Casablanca ni yo yafunguye amazamu mbere ku gitego yatsindiwe n’Umukongomani Ben Malango ku munota 47 w’umukino, cyishyurwa ku wa 61 na Ferjani Sassi.
Zamalek yatsinze igitego cya kabiri ku munota wa 85 w’umukino ibifashijwemo na Mostafa Mohamed, yongera kuyitsindira igitego cya gatatu nyuma y’iminota itatu.
Zamalek izahurira ku mukino wa nyuma na Al Ahly y’umutoza Pitso Mosimane, yabigezeho isezereye Wydad Casablanca yo muri Maroc ku giteranyo cy’ibitego 5-1.
Umukino wa nyuma wa CAF Champions league uteganyijwe ku wa 27 Ugushyingo kuri Stade ya Borg El Arab iherereye mu mujyi wa Alexandria mu Misiri.
