Ikipe yo mu Misiri ya Pharco FC ikinamo Umunyarwanda Iranzi Jean Claude irashaka gusinyisha Dani Alves wakanyujijeho muri FC Barcelona (Barça) kugira ngo ajye ayikinira.
Igitangazamakuru Goal gikora inkuru za siporo dukesha iyi nkuru kivuga ko iyi gahunda yatangajwe na nyir’iyi kipe, Shreen Helmy ubwo yari imaze kubona itike yo kujya muri shampiyona y’icyiciro cya mbere (Egyptian Premier League) ivuye mu cya kabiri.
Helmy yagize ati: “Ndi gushaka uko nazana Dani Alves akava muri Sao Paulo, twakungukira byinshi mu bunararibonye bwe.”
Ariko yaciye amarenga ko gusinyisha uyu mukinnyi bishobora kugorana, kuko yishimira ikipe ya Sao Paulo arimo. Yagize ati: “Dani Alves twarahuye, ambwira ko yifuje gukinira Sao Paulo kuva afite imyaka 8 y’amavuko, ubu ndumva namuzana muri Egyptian Premier League.”
Helmy unasanzwe ari Perezida wa Pharco FC yatangaje ko hari indi mishinga ikomeye iyi kipe ifite, irimo gufatanya na Lionel Messi mu bikorwa by’ubugiraneza.
Kuri Messi, Helmy yagize ati: “Twavuganye na Messi, si ukugira ngo aze adukinire ahubwo ni ukugira ngo dukomeza umubano n’uyu mukinnyi nyuma y’aho agaragarije uruhare rwe mu gutera inkunga ubuvuzi bwa Hepatite C.”
Dani Alves da Silva w’imyaka 38 y’amavuko yakiniye Barça kuva mu 2008 kugeza mu 2016, akina hagati, akaba yarayitsindiye ibitego 14 mu mikino 247 yayikiniye. Bamwe bamufata nk’umukinnyi wo hagati mwiza iyi kipe yagize.
