Umusirikare ufite ipeti rya Colonel mu gisirikare cya Misiri yakatiwe imyaka 6 y’igifungo azira gutangaza ko aziyamamariza umwanya w’umukuru w’igihugu mu matora yo mu mwaka utaha nk’uko byemezwa n’umwunganizi we mu mategeko ndetse n’umugore we.
Urukiko rwa gisirikare ngo rukaba rwarasanze Col. Ahmed Konsowa w’imyaka 42 ahamwa n’icyaha cyo kugaragaza ibitekerezo bye bya politiki kandi ari umusirikare uri mu kazi nk’uko uyu munyamategeko we, Asaad heikal yabitangarije Ibiro Ntaramakuru by’Abongereza, Reuters.
[xyz-ihs snippet=”google-pub”]
Konsowa yari yabanje gufungwa iminsi 15 nyuma aza kugaragara muri video mu kwezi gushize atangaza ko ateganya kuzahangana na perezida Abdel Fattah al-Sisi mu matora ateganyijwe muri uyu mwaka utaha dukozaho imitwe y’intoki.
Icyo gihe yatangaje ko yatanze impapuro zisaba gusezererwa mu gisirikare mu 2014 ariko ntizakirwe.
Abandi bakandida bagaragaje ko bateganya kuzahatana mu matora y’umukuru w’igihugu mu Misiri barimo Ahmed Shafik, wahoze ari Minisitiri w’Intebe, na Khaled Ali, Umunyamategeko uzwi muri iki gihugu.
Uyu Khaled muri Nzeri yahamijwe icyaha cyo kugumura abaturage byamaganwa n’imiryango iharanira uburenganzira bwa muntu ivuga ko yahamijwe icyaha ku mpamvu za politiki hagamijwe gukura mu nzira abatavuga rumwe na perezida uriho.
Perezida Sisi wahoze ari umugaba mukuru w’ingabo za Misiri, ntaratangaza niba aziyamamaza nubwo byitezwe ko nta kizamubuza. Uyu yasezeye mu gisirikare muri Werurwe 2014 mbere yo gutangaza kandidatire yemu matora ya perezida yabaye muri uwo mwaka ndetse akaba ari we uyatsinda.
Perezida Sisi kandi ni nawe wayoboye ihirika ry’ubutegetsi rya gisirikare ryo muri Nyakanga 2013 ryakuyeho perezida wa mbere wa Misiri watowe binyuze muri demokarasi, Mohammed Morsi.
Umugore wa Col Kinsowa, Rasha Safwat akaba yatangaje ko bazajuririra icyemezo cy’urukiko rwafunze umugabo we.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
