Intumwa z’Umuryango w’Abibumbye zigamije kubungabunga umutekano muri Repubulika Iharanira Demokarasi ya Congo (Monusco), muri iki cyumweru zitangaza ko ibikorwa bya gisirikare atari byo muti w’ibibazo gusa mu kurwanya ADF, inyeshyamba zikomoka muri Uganda, ziri ku butaka bwa Congo, zirwanira mu gace ka Beni, mu Bururasirazuba bw’iki gihugu.
Ibi byatangajwe ku wa 18 Ukwakira 2018 na Leila Zerrougui, intumwa yihariye y’Umunyamabanga Mukuru w’Umuryango w’Abibumbye, mu kiganiro n’abanyamakuru, cyabereye i Kinshasa. Avuga ko nta nzira n’imwe igomba kwigizwayo.
Ibi bitangajwe nyuma y’uko hubuwe imirwano yakurikiwe n’imyigaragambyo y’abaturage nyuma y’igitero giherutse kugabwa mu gace ka Beni. Muri iki kiganiro, Leila Zerrougui, yabanje kwibutsa inzitizi zihari zo kurwanya inyeshyamba za ADF.
Agira ati:”Ni gute mwatsinda urugamba rwa gisirikare? Mwica abantu bose mu gace k’imirwano? Abagore n’abana nibo bagize umubare munini kurusha abagabo bitwaje intwaro. Ni ngombwa ko habaho uburyo bushoboka bwose, bwaba ubwa gisirikare birumvikana, ariko na none hakabaho uburyo bwo gushakisha abantu bashobora kuvugana n’inyeshyamba bakazereka ukuri.Ubutabera nabwo ni imwe mu nzira zo gushakisha igisubizo.”
Na none ati, “Ni itsinda ry’abanyamahanga bitwaje intwaro. Ntibashobora gusaba uburenganzira bwa politiki muri Congo. Ni ngombwa ko ibintu bisobanuka.”
Icyegeranyo giherutse gushyirwa ahagagara n’umuryango uharanira uburenganzira bw’ikiremwamuntu “Human Rights Watch”, kigaragaza ko byibura abantu 235 biciwe mu bitero bisaga 100 byagabwe mu gace ka Beni, kuva muri Mutarama kugeza muri Nzeri uyu mwaka, abasivile 165 barashimuswe, abandi barakomereka cyangwa baburirwa irengero.
