Mozambique: Abarenga 50 bishwe baciwe imitwe n’inyeshyamba

Amakuru avuga ko abarwanyi bafashe ikibuga cy’umupira w’amaguru bakagihindura ahantu bahuriza abantu bakabica babatemaguye.

Mu wundi mudugudu ngo hari abantu benshi baciwe imitwe nk’uko byatangajwe n’ibitangazamakuru bya leta ya Mozambique.

Iri tangazamakuru rivuga ko abarwanyi bateye umudugudu wa Nanjaba baririmba ngo “Allah Akbar” (Imana ni yo nkuru), barasa amasasu banatwika amazu.

Muri uriya mudugudu ngo abantu babiri bahise bacibwa imitwe, abagore benshi barashimutwa.

Mu wundi mudugudu wa Muatide ngo irindi itsinda ry’abarwanyi bahagabye igitero, baca imitwe abantu 50.

Abaturage ngo bagerageje guhunga barafashwe bajyanwa ku kibuga cy’umupira w’amaguru, aho baciriwe imitwe bakanatemagurwa mu bwicanyi bw’indengakamere bwabaye kuva mu ijoro ryo ku wa Gatanu w’icyumweru gishize kugeza ku cyumweru.

Ni nyuma y’ibitero bikomeye abarwanyi bagiye bagaba mu gace gakungahaye kuri gaz ka Cabo Delgado kuva muri 2017.

Ni ibitero bimaze kugwamo abarenga 2,000; mu gihe ababarirwa mu 430,000 batakigira aho gukinga umusaya.

Amakuru avuga ko umutwe wa Islamic State ari wo ukomeje kugaba biriya bitero.

BBC ivuga ko abenshi mu baturage ba Mozambique bababajwe na buriya bwicanyi, bagasaba imyanzuro iciye mu mahoro yo guhashya amakimbirane abarwanyi ba IS bafitanye na leta ya Mozambique.

Cyakora cyo si ubwa mbere amajyaruguru ya Mozambique yibasirwa na biriya bitero, kuko nko muri Mata uyu mwaka abarenga 50 na bwo baciwe imitwe abandi bararaswa, mu mudugudu wa Cabo Delgado.

Mu ntangiriro z’uku kwezi na bwo abandi bantu 9 bishwe baciwe imitwe.