Leta Zunze Ubumwe za Amerika (USA) mu mwaka w’2021 zashoye amadolari miliyari 801 mu gisirikare, mu gihe u Burusiya bwashoye miliyari 65.9.
Nk’uko bigaragara muri raporo yo kuri uyu wa 25 Mata 2022 y’ikigo cya SIPRI (Stockholm International Peace Research Institute) gikora ubushakashatsi ku mahoro, Isi yashoye amafaranga menshi mu gisirikare mu 2021 ugereranyije n’imyaka yabanje, n’ubwo icyorezo cya Covid-19 cyari kiyugarije.
SIPRI muri iyi raporo yagize iti: “Igishoro Isi yashyize mu gisirikare mu 2021 cyakomeje kwiyongera, kigera ku gaciro kanini kabayeho ka tiriyari 2.1 z’amadolari. Ni ku nshuro ya karindwi yikurikiranya iki gishoro cyiyongera.”
Ibihugu bya mbere byashoye amafaranga menshi mu gisirikare ni: USA, u Bushinwa, u Buhinde, Ubwami bw’u Bwongereza n’u Burusiya, byose hamwe bikaba byigariye igipimo cya 62% cy’Isi yose.
Amafaranga USA yashoye mu gisirikare, yibanze mu bushakashatsi n’iterambere ryacyo by’umwihariko mu rwego rw’ikoranabuhanga, nk’uko iyi raporo ibisobanura. Gusa igishoro cyayo cyagabanyutseho 1.4% ugereranyije n’umwaka w’2020.
Alexandra Marksteiner ushinzwe ubushakashatsi mu ishoramari mu gisirikare na gahunda y’ikorwa ry’intwaro muri SIPRI yavuze ku kwibanda mu bushakashatsi n’iterambere kwa USA.
Yagize ati: “Kongera igishoro mu bushakashatsi mu kinyacumi cy’imyaka 2012-2021 bisobanura ko USAiri kwibanda mu ikoranabuhanga rigezweho. Guverinoma ya US yashimangiye kenshi ko ishaka kubungabunga ikoranabuhanga ry’igisirikare cyayo, yigereranya n’abihugu bihatanye.”
Raporo ivuga ko u Burusiya mu 2021 bwongereye igishoro ku gisirikare ku gipimo cya 2.9% ugereranyije n’umwaka wabanje, kigera ku madolari miliyari 65.9. Ibi ngo byabaye mu gihe bwubakaga ubushobozi bw’ingabo zabwo ku mupaka buhuriyeho na Ukraine.
Mu busesenguzi bw’umushakashatsi Lucie Béraud-Sudreau, abibona atya: “Inyungu iva mu bikomoka kuri peteroli na gazi byafashije u Burusiya kongera igishoro mu gisirikare mu 2021. Igishoro mu gisirikare cy’u Burusiya cyari cyaragabanyutse hagati y’2016 n’2019 bitewe n’igiciro gito cy’ingufu hamwe n’ibihano bwari bwarafatiwe bitewe no kwiyomekaho Crimea mu 2014.”
U Bushinwa bwashoye amadolari miliyari 293, ziyongereyeho 4.7%, ikaba ari inshuro ya 27 iki gishoro cyiyongereye cyikurikiranya. Naho u Buhinde bwo bwashoye miliyari 76.6 ziyongereyeho 0.9% ku mwaka wabanje, u Bwongereza bushora miliyari 68.4.
