Mu 2028, u Bushinwa buzaba bumaze gusiga Leta Zunze Ubumwe za Amerika mu bukungu, imyaka itanu mbere y’igihe cyari giteganyijwe kubera icyorezo cya Covid-19 nk’uko byemezwa muri raporo nshya yashyizwe ahagaragara.
Ikigo cy’ubushakashatsi mu bukungu na business cyo mu Bwongereza (CEBR) mu mbonerahamwe ngarukamwaka y’ubukungu bw’Isi yashyizwe ahagaragara kuri uyu wa Gatandatu kivuga ko imwe mu ngaruka z’ihungabana ry’ubuzima ku Isi ari “ugusaranganya umuvuduko w’ubukungu na Aziya ikora neza n’u Burayi bukora nabi “.
Uyu avuga ko ubuhanga bw’u Bushinwa mu “gucunga neza icyorezo” n’ingaruka ndende icyorezo kizagira ku izamuka ry’uburengerazuba bivuze ko “imikorere y’u Bushinwa ugereranije yateye imbere.”
“Ubu turatekereza ko ubukungu bw’ u Bushinwa mu bijyanye n’idolari buzarenga ubukungu bw’Amerika muri 2028, imyaka 5 yuzuye mbere y’uko twabitekerezaga umwaka ushize”, ibi ni ibikubiye muri iyi raporo.
Nk’urugero, raporo irerekana ko abayobozi bahanganye neza n’ikibazo cya COVID-19, bikagira ingaruka nkeya ku bukungu. Kubera iyo mpamvu, mu gihe ubukungu bw’ibihugu byinshi by’iburengerazuba bwitezweho kuzamuka ku rugero ruto cyane mu mwaka, u Bushinwa bwitezweho kuzamuka ku gipimo cya 2%.
Ubukungu bw’u Bushinwa bwitezweho kuzajya buzamukaho 5,7% buri mwaka hagati ya 2021 na 2025 na 4.5% buri mwaka kuva mu 2026 kugeza mu 2030, na 3,9% mu myaka itanu izakurikiraho.
Ni mu gihe Leta Zunze Ubumwe za Amerika iteganya izamuka ry’ubukungu ku rugero rwa 1,9% kuva mu 2022 kugeza mu 2024, na 1,6% nyuma y’icyorezo mu mwaka utaha nk’uko iyi nkuru dukesha Euronews ivuga.
Mu gihe runaka, insanganyamatsiko yibanze ku bukungu bw’Isi yabaye urugamba rw’ubukungu rworoheje hagati y’Amerika n’u Bushinwa. Raporo ivuga ko icyorezo cya Covid-19 hamwe n’ubukungu bwifashe nabi byanze bikunze byagize uruhare mu guhangana n’u Bushinwa. ”
Nk’uko byemezwa na Kaminuza ya Johns Hopkins, Amerika ni cyo gihugu cyibasiwe cyane ku Isi n’icyorezo cya Covid-19 kimaze guhitana abantu barenga 330.000 mu gihe abacyanduye bakabaka miliyoni 19 kuva cyatangira.
