Ku wa 7 Werurwe 2019 Urukiko Rwisumbuye rwa Muhanga rwasomeye mu ruhame urubanza Ubushinjacyaha bwari bukurikiranyemo umugore witwa Nyirabizimana Immaculee icyaha cyo kuroga umwana we rumukatira igifungo cy’imyaka 25 .
Ku wa 4 Werurwe 2019, Ubushinjacyaha ku rwego rwisumbuye rwa Muhanga rwasabiye igihano cy’igifungo cya burundu Nyirabizimana Immaculee ukurikiranyweho icyaha cyo kuroga umwana we w’umukobwa w’ umwaka ahuhaye umuti wica udukoko (Rocket) . Ibyo akaba yarabikoze agamije kumwica kugira ngo abane n’undi mugabo. Iburanisha ryabereye aho icyaha cyakorewe mu karere ka Kamonyi, Umurenge wa Mugina.
Nyirabizimana Immaculee wari wasigaranye mu rugo n’umwana we w’umukobwa, ubusanzwe abana n’ababyeyi be. Ubwo iwabo bavaga guhinga, basanze umuti wica udusimba unuka mu rugo bituma bagira amatsiko yo kumenya aho wavuye.
Babajije aho uwo muti wavuye, Nyirabizimana yarabihoreye, bamwegereye, basanze umwana we yari ahetse ari kuzana urufuzi ari mu mugongo. Umwana bahise bamujyana kwa muganga, abaganga basanga yahawe uwo muti wica udukoko ariko ku bw’amahirwe abasha kubaho. Ibi bikaba byarabaye ku wa 15 Gashyantare 2019.
Nyirabizimana yaburanye yemera icyaha avuga ko yaroze umwana we kugira ngo abane n’undi mugabo wari wamubwiye ko abanza kwica umwana kuko atari kumutunga afite uyu mwana nk’uko iyi nkuru dukesha Ubushinjacyaha Bukuru ikomeza ivuga.
Icyaha cyo kuroga Nyirabizimana akurikiranyweho, giteganywa kandi kigahanwa n’ingingo ya 110 y’itegeko no 68/2018 ryo ku wa 30/08/2018 iri tegeko riteganya ibyaha n’ibihano muri rusange.
