Visi Meya w’Akarere ka Musanze ushinzwe iterambere ry’ubukungu, Ndabereye Augustin ari mu maboko rw’Urwego rw’Igihugu rw’Ubugenzacyaha (RIB), akurikiranyweho gukubita no gukomeretsa umugore we.
Bitangazwa ko Ndabereye yagiranye amakimbirane n’umugore, bityo aramukubita, ku buryo ubu ngo arimo kuvurirwa ku bitaro bya Ruhengeri.
Aya makuru yemejwe na RIB ko yamutaye muri yombi mu gitondo cyo kuri uyu wa Gatanu tariki ya 30 Kanama 2019, nyuma yo gukora iki cyaha ashinjwa.
Nk’uko RIB yabitangaje ibicishije ku rukuta rwa Twitter. Yagize iti “RIB yataye muri yombi Ndabereye Augustin, Visi Meya w’Akarere ka Musanze ushinzwe iterambere ry’ubukungu, ashinjwa gukubita umugore we”.
Itangaza ko uyu muyobozi afungiye kuri sitasiyo ya RIB ya Muhoza, i Musanze.
